Талдықорған. 1 қараша. 7kun.kz – Бірнеше банкоматты бұзып, қолма-қол ақшамен жасырынуға тырысқан деген күдікпен 33 жастағы ер адам ұсталды, деп хабарлайды 7kun.kz.

Полиция сақшылары күдіктіні ұстауға жеке күзет ұйымының қызметкері де көмектескен.

Ұсталған азамат Сарқан қаласының тұрғыны болып шықты. Ер адамнан ұрылардың бүкіл арсеналы – арқан, тістеуік, металл кескіш, бетперде және жұмыс қолғаптары тәркіленді. Полицейлердің айтуынша, күдікті қылмыстарына мұқият дайындалып, ену әдістерін, бейнебақылау камераларының болуын және қашу жолдарын зерттеген.

«Қазір күдіктінің Талдықорған қаласында үш ұрлыққа, Сарқан қаласында үш дерекке және Ақсу ауданы Жансүгіров ауылында бір ұрлыққа қатысы бар-жоғы анықталуда. Алты жағдайда ақша банкоматтарын бұзу тіркелді. Жалпы шығын шамамен 8 млн теңгені құрады», – деді полицияда.

Күдікті қамауға алынды. Оның басқа да қылмыстарға қатысы бар-жоғы тексерілуде.