Астана. 22 қазан. 7kun.kz – ҚР президенті Қасым-Жомар Тоқаев «Қазақстан Республикасының мемлекеттік наградаларымен наградтау туралы» жарлыққа қол қойды. Бұл туралы Ақорданың баспасөз қызметі хабарлады.

Барлығы Республика күні ұлттық мереке қарсаңында елдің әлеуметтік-экономикалық және мәдени дамуына, халықтар арасындағы достық пен ынтымақтастықты нығайтуға қосқан елеулі үлесі, белсенді қоғамдық қызметі үшін марапатталып отыр.

Мемлекет және қоғам қайраткері Қайырбек Сүлейменовке зор еңбегі үшін «Халық қаһарманы» атағы, ал жазушы Дулат Исабековке және «АтырауАгроӨнімдері» ЖШС директоры Владимир Розметовке «Қазақстанның Еңбек Ері» атағы берілді.

Бұдан бөлек, президент Абай атындағы әдебиет пен өнер саласындағы 2022 жылғы мемлекеттік сыйлығын бірақатар адамға табыстады.

1. Жайлыбай Ғалымға, ақын – «Ай таңбалы арғымақ» өлеңдер мен поэмалар жинағы үшін;

2. Жақыпбай Нұрқанатқа, режиссер – «Жібек» мюзиклі үшін;

3. Мыржықбай Кенжеғали Тұрсынбекұлына, әнші – «Жүрегім, нені сезесің?» концерті үшін;

4. Сәукетаев Тұрыспекке, жазушы – «Желқайық» романы үшін;

5. Сегізбай Кәдірбекке, жазушы – «Тағдыр толқыны» романы үшін;

6. Смағұлов Сембіғали Абзалбекұлына, мүсінші – «Үш арыс» мүсіндік композициясы үшін;

7. Тұрысбек Секен Кәрімұлына, композитор – «Тәтті мұң» ән-күй партитуралары, клавирлер, өлеңдер жинағы үшін берілді.