Алматы. 21 қыркүйек. 7kun.kz – АҚШ президенті Дональд Трамп 20 қыркүйекте Қаржы министрлігіне Ресейге қарсы Қырымды аннексиялап алуына, Украинаға қатысты басқыншылық іс-қимылдарына байланысты және "Американың жауларына санкция арқылы қарсы іс-қимыл туралы" заңға сай енгізілген санкциялар мәселесінде қосымша өкілеттік беретін жарлық шығарды.

Ақ үй сайтында жарияланған жарлық жаңа санкциялар салмайды, тек Ресейге қарсы қолданыстағы шектеу шараларын қолдану режимін тәртіпке келтіреді. Трамптың Конгресс палаталарының басшыларына жолдаған ілеспе хатында жарлықтың санкция режимін бұрынғыдан да қатаң сақтауға бағытталғаны айтылады. Атап айтқанда, жарлықта санкция ауқымын анықтау мен оның бұзылмауын қамтамасыз етуде Мемлекеттік департаментпен бірлесіп жұмыс істегенде қаржы министрлігінің жетекші рөл атқаратыны қарастырылған.

Құжатта сонымен қатар АҚШ-тың Ресейдің жеке және заңды тұлғаларына енгізуі мүмкін санкциялары көрсетілген. Ықтимал санкция арасында несие беруді шектеу немесе тыйым салу, активтерді бұғаттау, АҚШ азаматтары мен компанияларының санкцияға енгізілгендермен жұмыс істесуіне тыйым салу, виза беруден бас тарту және басқа да шаралар бар.