Шымбұлақ тау курорттарының үздік үштігіне енді

Шымбұлақ
Фото: Voxpopuli.kz

Алматы. 14 наурыз. 7kun.kz — RoomGuru.ru қонақ үй іздеу қызметі көктемгі сноубордқа арналған және балалармен бірге демалуға болатын танымал тау курорттарының тізімін жасады. Рейтинг 2017 жылдың 25-31 наурыз күндері балалармен тұруға арналған қонақ үйлерді брондау деректері бойынша құрылды.

2017 жылы балалармен саяхат жасау саны өткен жылмен салыстырғанда 10%-ға өскен. Шымбұлақ көктемгі тау-шаңғы демалысы бойынша үшінші орынға табан тіреді. Шерегеш (РФ Кемеров облысы), Ливиньо (Италия), Шымбұлақ  (Алматы, Қазақстан), Хибины (РФ Мурманск облысы) және Шахдаг (Гусар, Әзербайжан) көктемгі уақытта балалармен қыдыруға арналған танымал тау курорттарының алғашқы бестігіне кіреді.

RoomGuru.ru қызметінің хабарлауынша, Шымбұлақта туристер отбасылық демалыс үшін қонақ үй, тамақтану және ски-пассты қосқанда тәулігіне шамамен 150 доллар жұмсайды. Балалармен баруға арналған шетелдік қалалардың үздік бестігіне Прага, Таллин, Минск, Будапешт және Барселона қалалары енген. RoomGuru.ru —  HotelsCombined.com қызметінің ресейлік сайты, World Travel Awards сыйлығы соңғы төрт жылда үздік қонақ үй іздеуші деп таныған.