Түрік компаниясы керамикалық зауыт құрылысына 47 млрд теңге инвестициялайды

керамикалық
Фото: ramz.com.sa

Алматы. 6 ақпан. 7kun.kz – Қызылорда облысында 47,3 млрд теңгеге керамикалық плиткалар өндіретін зауыт салу жоспарлануда.

Облыстық индустриялық-инновациялық даму басқармасы жоба «Rino Asia» түрік компаниясымен бірлесіп жүзеге асырылатынын хабарлады.

Ведомство мәліметтеріне сәйкес, қазіргі уақытта инвестор плитка өндірісі үшін жабдықты жеткізушімен келіссөздер жүргізуде.

«Өндірістік жабдықтарды орналастыру бойынша техникалық жоспар әзірленді. Жоба бойынша техникалық-экономикалық негіздемені әзірлеуге қатысты консалтингтік компаниямен келіссөздер жүргізілуде. Қызылорда облысында 100 гектардан астам жер учаскесі таңдалып алынды, шикізаттың химиялық құрамын талдау үшін зертханалық жұмыстар жүргізілуде», — деп түсіндірді басқарма.

Шығарылған өнімнің 60%-ы Қазақстанда сатылатын болады, қалған 40% Өзбекстан, Қырғызстан, Тәжікстан, Ауғанстан және Ресейге экспортталады деп жоспарлануда.

Бұл ретте, Қазақстанда жылына 1,5 млн шаршы метр плитка өндіріледі. Жалпы қажеттілік жылына 25 млн шаршы метрді құрайды, қалған нарық импорттық тауарларды қамтиды.