Қазақстанда табиғи газ бір жылда 11,1 пайызға қымбаттаған

27 наурыз, 2017

Астана. 27 наурыз. 7kun.kz - 2017 жылдың қаңтар-ақпан айларында газ отынын өндіру мен үлестіру 41,7 млрд теңгеге жетті. Бұл бір жыл бұрынғы көрсеткіштен 12,9 пайызға көп. Көп жылғы динамикаға үңілсек, тұрақты өсімді байқауға болады. Мысалы, 2016 жылы көрсеткіштер 2015 жылмен салыстырғанда 31,5 пайызға, 2015 жылғы көрсеткіш 2014 жылмен салыстырғанда 45,2 пайызға өскен. Бұл туралы kursiv.kz жазды.

Өсім өндіріс саласында да анық байқалады. Жыл басынан бергі екі ай ішінде өндірілген таскөмір, су, генераторлық және басқа да газ түрлерінің көлемі 9,1 пайызға өскен. Одан бөлек, үлестірілген табиғи газдың да мөлшері жыл бұрынғы көрсеткіштен 6,2 пайызға көп.

Қазақстанның энергетика министрі Қанат Бозымбаевтың мәлімлеуінше, елді газбен қамтамасыз ету сатылы түрде іске асып келеді. Ол соңғы 10 жылда елде 8 млн адам газға қол жеткізгенін, бұл халықтың 46,3 пайызы екенін айтты.

EnergyProm агенттігінің ақпаратына сәйкес, тасымалдау желілері арқылы үлестірілетін табиғи газ бағасы өткен жылмен салыстырғанда 11,1 пайызға өсіп, текшеметрі 17,05 теңгеге қымбаттаған. Ең жоғары баға 1 жылда 19 пайызға қымбаттап, текшеметрі 32,61 теңге болған Алматы мен өткен жылдан бері 7 пайызға қымбаттап, газдың текшеметрі 31,34 теңге тұратын Шымкенте тіркелген.