Ақмола облысы. 29 наурыз. 7kun.kz - Жұмыс сапары аясында Премьер-Министрдің орынбасары Гүлшара Әбдіқалықова бастаған үкіметтік топ тұрғындарды жеке қабылдап, халықпен кездесу өткізді, сондай-ақ көпбалалы отбасылардың үйлеріне барды. Бұл туралы primeminister.kz сайты хабарлады.

Үкіметтік топ алдымен Щучинск қаласында Жоғары педагогикалық колледж жастарымен кездесу өткізілді. Вице-премьер Жастар жылын өткізу жөніндегі жол картасы аясында 5 негізгі бағыт бойынша 80-нен астам іс-шара іске асырылып жатқанына баса назар аударды. Шаралар жастарды баспанамен қамту, жұмыспен қамту, білім беруді дамыту, волонтерлік, ғылыми гранттар беру, әлеуметтік белсенділікті кеңейту, жас отбасыларды қолдау, денсаулық және әлеуметтік инклюзивтілік мәселелерін қамтиды.

Бүгінде колледжде «Бастауыш білім беру», «Мектепке дейінгі тәрбие мен оқыту», «Дене шынықтыру және спорт», «Кәсіптік оқыту», «Музыкалық білім беру», «Негізгі орта білім» мамандықтары бойынша 1 мыңнан астам студент білім алып жатыр. Еңбекпен қамтылу үлесі 97% құрайды. Студенттер кездесуде мемлекеттік жастар саясатына қолдау білдіре отырып, өздерінің креативті ұсыныстары мен идеяларын жеткізді.

Үкіметтік топ Бурабай ауданы Кенесары ауылының, Біржан сал ауданы Макинка ауылының және Бұланды ауданы Алтынды ауылының халқымен де кездесті.

«Әрбір бағыт өлшенетін көрсеткіштерімен, тетіктерімен және соларға арнайы бөлінген қаражаттармен нақты әрі айқын шаралардан тұрады. Олар халықтың әлеуметтік осал топтарын қорғауды күшейтуге, сондай-ақ олардың әл-ауқатын арттыруға мүмкіндіктер мен жағдайлар жасауға жол ашады. Азаматтардың әл-ауқаты соларға байланысты. Қолынан келетіннің бәрі еңбек етуге міндетті. Ал дене мүмкіндіктеріне немесе өзге де себептерге байланысты жұмыс істеуге мүмкіндіктері жоқ азаматтарға мемлекет әлеуметтік қолдау көрсетуде», - деді Г. Әбдіқалықова кездесуде.

Премьер-Министрдің орынбасары көпбалалы және аз қамтылған отбасыларға да барды. Тілек Төлегеннің отбасында мектеп жасындағы 4 бала бар. «Еңбек» өнімді жұмыспен қамту және жаппай кәсіпкерлікті дамыту бағдарламасы аясында 2 млн 200 мың теңге көлемінде шағын несие алған отағасы 10 ірі қара мал сатып алған. Ауыл бизнесмені өз отбасын толық қамтамасыз етіп қана қоймай, жаңа жұмыс орындарын да ашып отыр. Г. Әбдіқалықова облыс басшылығына осындай оң тәжірибелерге жан-жақты қолдау көрсетуді тапсырды.  

Жұмыс тобының мүшелері Ақмола облысының басқа аудандары мен ауылдарында да болды.

Топ мүшесі, Білім және ғылым министрі К. Шәмшидинова облыстағы бірқатар білім беру нысанын аралады. Олардың арасында  «Айша» және «Балдырған» балабақшалары, АT-лицей, Ш. Уәлиханов атындағы Көкшетау мемлекеттік университеті, Көкшетау қаласындағы Жоғарғы техникалық колледж, Зеренді ауданындағы Шағалалы ауылы Жоғарғы агротехникалық колледжі, Зеренді ауылындағы М. Ғабдуллин атындағы мектеп-интернат, Ақкөл балалар үйі бар.

2018 жылы Елбасы тапсырмасы бойынша жаңа аттестаттау жүйесіне сәйкес санаттарын растаған және жаңартылған білім мазмұнымен жұмыс  істейтін мектеп мұғалімдерінің жалақысы 30-50% көтерілгені белгілі. Маусым айынан бастап мектепке дейінгі білім беру ұйымдарының тәрбиешілері мен тәрбиешілердің көмекшілері т. б. үшін сараланған жалақы 30% дейін артады. Сонымен қоса, облыста үш ауысымдық оқыту мәселесін шешу үшін 7 нысанның және оқушылардың орын тапшылығын жою үшін бір нысанның құрылысы жүріп жатыр. Биыл 280 орындық 1 балабақшаны пайдалануға енгізу, 1075 орындық 10 мектепке дейінгі ұйымды ашу және жұмыс істеп тұрған 120 орынды кеңейту жоспарланған.   Республикалық бюджет қаражаты есебінен 8,2 млрд теңге сомасына 7 нысан салынып жатыр. Оның ішінде 2 нысанды 2019 жылы пайдалануға беру көзделген.

Денсаулық сақтау министрі Е. Біртанов жұмыс сапары аясында Бұланды, Еңбекшілдер, Степногор және Ақкөл ауруханаларының медицина қауымымен кездесті. Денсаулық сақтау жүйесінің қызметкерлеріне алғашқы медициналық-санитарлық көмектің сапасы мен қолжетімділігін арттыру, еңбекақыны көтеру, саланы цифрландыру және тағы басқа мәселелер бойынша қабылданып жатқан шаралар түсіндірілді.

«Nur Otan» партиясының хатшысы Ф. Қуанғанов Есіл және Астрахань аудандарының тұрғындарымен кездесу барысында Елбасы Н. Ә. Назарбаев «Nur Otan»  партиясына 4 жаңа жобаны іске қосуды тапсырғанын атап айтты, олар: инженерлік және әлеуметтік инфрақұрылымды дамытуға басымдық берумен «Құтты мекен»; ауылды дамытуға бағытталған «Ауыл - Ел бесігі»; көп балалы және аз қамтылған отбасыларды қолдау бойынша «Бақытты отбасы»; партияның Қоғам қабылдаулары негізінде халықтың әлеуметтік қорғалатын тобын қолдауға бағытталған «Халыққа көмек» бірыңғай әлеуметтік терезесі. Сонымен қатар, жұмыс тобының әрбір мүшесі азаматтарға жеке қабылдаулар өткізіп, облыстағы ауылдар мен қалалардың тұрғындарымен кездесті.

Еске сала кетейік, ҚР Премьер-Министрінің орынбасары Г. Әбдіқалықова бастаған Үкіметтің жұмыс тобының құрамына еңбек және халықты әлеуметтік қорғау министрі Б. Сапарбаев, білім және ғылым министрі К. Шәмшидинова, денсаулық сақтау министрі Е. Біртанов, Құрылыс және тұрғын үй-коммуналдық шаруашылық істері комитетінің төрағасы М. Жайымбетов, «Nur Otan» партиясының хатшысы Ф. Қуанғанов, «Атамекен» ҰКП басқарма төрағасының орынбасары Л. Рамазанова, сондай-ақ БАҚ өкілдері мен блогерлер кірді. Елбасының «Әлеуметтік қамқорлық» жаңа әлеуметтік шараларын түсіндіру мақсатымен ел өңірлеріне жұмыс сапарлары жалғасатын болады.

Дереккөзі, фото www.inform.kz