Еліміздегі алғашқы ақылы жол «Астана-Шортанды» тас жолы пайдалануға берілгені белгілі. Бұл жол 2013 жылы миллиард теңге көлемінде пайда тапса, 2014 жылы 1,2-1,3 млрд теңге көлемінде кіріс әкелді. Ал алдағы уақытта салынатын ақылы жолдар қандай болмақ? Бұл туралы 7kun.kz анықтап көрді.

Автожолдарды салу орта есеппен 4 жылға жоспарланады. ҚР Көлік және коммуникация министрлігінің Автомобиль жолдары комитетінің өкілі Ратмир Ахметов атап өткендей, «Астана – Теміртау» және «Алматы – Капшағай» жобалары іске қосылғаннан кейін автокөлік иелеріне жолақы тарифін енгізу жоспарланған. Еліміздегі республикалық маңызы бар тас жолдардың құрылысы 2020 жылы аяқталуы қажет. Осы уақытқа дейін жолдарды ақылы ету жүйесі де ретке келтіріледі. Жоспар бойынша, 2020 жылға қарай Қазақстандағы ақылы жолдардан бюджетке жылына 220 млн доллар пайда түсіп тұрады. "КазАвтоЖол" ҰК" АҚ  басқарма басшысы Берік Камалиевтің айтуынша, 2016 жылы Батыс Еуропа – Батыс Қытай көлік коридорының жөндеу жұмыстары бітпек, ал 2020 жылға қарай Орталық – Оңтүстік,  Орталық – Шығыс, Орталық – Батыс бағыттары бойынша ірі үш жобаның құрылысы аяқталады деп күтілуде. 2020 жылға қарай республикалық желілердің 48 пайызы бірінші және екінші техникалық категорияға жататын болады.