Алматы. 13 сәуір. 7kun.kz - Алматы қаласында инновациялық грант беру бойынша жұмысшы топтардың отырысы өтті. Отырыс барысында кәсіпкерлерге инновациялық бизнес идея үшін 3 млн теңгеге жуық грант берілетіні белгілі болды. Бұл туралы Алматы қаласы Кәсіпкерлік және индустриалды-инновациялық даму басқармасының баспасөз қызметі хабарлады. 

Осыған байланысты қабылдау комиссиясы 1-31 наурыз аралығында 73 өтінішті қарастырған. Ал аталған грантқа қол жеткізу үшін өткізілетін конкурсқа жас кәсіпкерлер, жұмысқа қабілетсіз, яғни мүгедек тобына жататын азаматтар және жасы 50-ден асқан тұлғалар қатыса алады. Мемлекеттік грант "Бизнестің жол картасы - 2020" бағдарламасы аясында бизнесті дамыту үшін беріледі.  Осыған байланысты конкурсанттар мынадай критерийлерге сәйкес келуге тиіс:

Ұсынылатын бизнес жоба идеясының жаңалығы болу керек. Сондай-ақ, жоба бәсекеге қабілетті болғаны жөн: маркетингтік сараптамадан өткізіліп, кәсіпкерлік жобаның ұсынатын қызмет түрі мен тауарына нарықтық сұраныстың қандай екені, дайындығы мен жүзеге асырылуы нақты анықталуы керек.

Сондай-ақ, бизнес жобаның міндетті шартарының бірі конкурсаннтарды қаржыландыру шығыны сұраған грант көлемінің 10 пайызынан кем болмауы тиіс және грантқа бөлінген қаржы жылжымайтын мүлік немесе жер учаскесін сатып алуға жұмсалмайды.