Министрдің атап өтуінше, осыған дейінгі кезеңде "экономикалық жағдайдың қиын болуына байланысты, шегіртке қаптауы болған еді". "Кейінірек жыл сайын қажетті шаралар қабылданып отырды. Зиянкестермен, әсіресе, шегірткелермен күреске бөлінетін қаржы жеткілікті. Сол қаржының аясында арнайы график бойынша қажетті шаралар өткізу қажет", -деп атап өтті Мырзахметов. Бұған дейін  Оңтүстік Қазақстан облысындағы Сарыағаш, Арыс және Шардара аудандарында шегірткенің көбейгені байқалды деп хабарланған еді. Ауыл шаруашылық министрлігінің мәліметінше, жергілікті органдар 26 мың га аумақты химиялық өңдеу үшін 48 млн теңге көлемінде қаржы бөлген. Зиянкестермен күрес жүргізу үшін мемлекет бюджеті 4,6 млрд теңге бөлді. Аталған қаржы 5,2 млн га аумақта тазартуға мүмкіндік береді.