Алматы. 15 тамыз. 7kun.kz - Кеше Астанада Н.Назарбаев Қырғыз Республикасының Премьер-Министрі Сооронбай Жээнбековпен кездесті. Бұл туралы akorda.kz хабарлады.

Қырғызстанның Премьер-Министрі кездесуге мүмкіндік тудырғаны үшін Нұрсұлтан Назарбаевқа алғыс білдіріп, «ЭКСПО-2017» халықаралық көрмесінің табысты өтіп жатуына орай құттықтады. – Сізге Қырғыз Республикасына көрсеткен қолдауыңыз үшін алғыс айтамын. Біз Сіздің және ел Үкіметінің деңгейінде бауырлас Қазақстанның қолдауын әрдайым сезініп келеміз, – деді С.Жээнбеков. Қазақстан Президенті мемлекеттер басшыларының өзара қарым-қатынасы емес, халықтарымыздың тарихи жақындығы мен олардың бір-біріне деген сенімі екі ел арасындағы ынтымақтастық негізін құрайтынын атап өтті. – Біз – көршілес әрі бауырлас халықпыз. Мен әрдайым Қырғызстан болашағының жарқын болуы үшін мүмкіндігінше қажетті қолдау көрсететін боламын. Экономикалық тұрғыдан даму үшін саяси тұрақтылықтың болуы маңызды. Біз әрдайым қырғыз халқымен біргеміз. Қырғызстанда президент сайлауы болғалы жатыр. Қырғыз халқы сайлаған Президентпен бірге жұмыс істейтін боламыз, – деді Мемлекет басшысы. Айта кетейік, қазіргі кезде Қырғызстанда сайлауалды шаралар жүргізілуде. Қазірге дейін 50-ге жуық үміткер тіркелген.  Сарапшылар негізгі тартыс  «Республика» партиясының жетекшісі Омурбек Бабанов пен премьер-министр Сооронбай Жээнбеков арасында өтеді деген болжам айтады.