Назарбаев алғашқы қаржылық келісім-шарттары туралы айтып берді

Экономика

Назарбаев алғашқы қаржылық келісім-шарттары туралы айтып берді

12 декабря, 2016

Президент Нұрсұлтан Назарбаев деректі фильмге берген сұхбатында ірі қаржылық келісім-шарттар туралы айтып берді. Оның ішінде, президент сол кездері құлдыраудың алдында тұрған Теміртау металлургиялық комбинатын құтқару үшін Лакшми Митталмен келіссөз жүргізгенін айтты.

90-жылдары аталған комбинатта 250 мыңға жуық адам жұмыссыз қалған еді. Миттал Назарбаевқа кәсіпорын "түкке тұрмайтынын" айтқан. "Ол біздің зауыт құтқаруға тұрмайтынын айтты, сонда мен, сенің мұның не, бұл - Кеңес одағында салынған соңғы зауыт дедім", - деді Назарбаев. "Біздің өкілдеріміз сөйлесіп болған соң келісімге келе алмады, кейін оның өзіне хабарласып, қайта шақырдым да, екі-үш сағат сөйлескен соң ол зауыттың барлық қарызын төлеп, 350 млн доллар инвестиция құюға келісетінін айтты", - деді президент сұхбатында. Назарбаев содан бастап адамдар қайта зауытқа келіп, қалада өмір басталғанын әңгімелеп берді.

Одан бөлек, президент "Шеврон" компаниясымен болған келісім туралы да айтты. Ол жылдары КСРО-да мұнай кен орындарын іске қосу үшін жеткілікті білім мен ақша болған жоқ. Алғашқы ірі келісімдердің бірі Теңіз кен орнынан мұнай өндірген "Шеврон" компаниясымен жасалған еді. "Келісім-шарт жасалған соң Отанымызды сатып жатырмыз деген әңгіме көбейіп кетті. Ананы сатамыз, мынаны сатамыз. Бұл өзін көрсеткісі келген адамдардың негізсіз айтқан әңгімесі. Сонда елді дамыту үшін ақшаны қайдан алуымыз керек еді? Шамамен 300 млрд доллардай ақша тікелей инвестиция ретінде келді. Кредит емес. Яғни, америкалық компаниялар келді де, өз қаржысын бізге салып, өндіре бастады. Міне, осының арқасында Қазақстан дамыды. Олар тек ақша әкелген жоқ, технология да әкелді. Иә, бізде қазба байлығы жетеді. Бұл Қазақстанға не береді? Халыққа ше? Шикізатты шығарып сату керек, ақша жинап, халыққа беру керек. Мәселе - осыда. Адамдарға жұмыс та беру керек", - дейді Нұрсұлтан Назарбаев.