Руслан Даленов: Жыл басынан бері ЖІӨ 4%-ға өсті

79
зейнетақы
Фото: primeminister.kz

Алматы. 14 мамыр. 7kun.kz – Қаңтар-сәуірде Қазақстанның ЖІӨ 4%-ға өсті. Бұл туралы ұлттық экономика министрі Руслан Дәленов Үкімет отырысында мәлімдеді.

«Қаңтар-сәуір айларында Қазақстанның жалпы ішкі өнімі 4% -ға өсті. Қаңтар-наурыз айларында елдің экономикасы 3,8% -ға артты. Оң динамика өңдеу өнеркәсібінде, қызмет көрсету секторында, сондай-ақ құрылыс пен ауыл шаруашылығында тұрақты қарқынмен қамтамасыз етілді. Инфляция деңгейі жоспарланған дәлізде. Жыл басынан бері ол 1,8%-ды, жылдық мәнде — 4,9%-ды құрады», — деді министр.

Оның айтуынша, инвестиция серпіні ЖІӨ өсімінен асып түседі. Осылайша, бұл көрсеткіш 6,7%-ды құрады. Ауыл шаруашылығында, құрылыста және өнеркәсіпте инвестициялар айтарлықтай өсті.

2019 жылдың 1 сәуірінде халықаралық резервтер 86 млрд долларды құрады.

Министрдің хабарлауынша, ағымдағы жылғы қаңтар-сәуірде өнеркәсіп өндірісі 2,9%-ға өсті. Өсім өңдеуші өнеркәсіптегі озық қарқын есебінен қамтамасыз етілді. Сонымен қатар, тау-кен өнеркәсібінде өсім баяулайды. Өсім 2,6%-ды құрады.

«Бұл үрдіске мұнай өндіру қарқынының теріс аймаққа ауысуы әсер етті. Есепті кезеңде көлемі 1,1% — ға қысқарды. Ал бірінші тоқсанда 2,7% деңгейінде өсім болды. Төмендеу — жүргізіліп жатқан жоспарлы-алдын алу жұмыстарынан сәуір айында Қашаған кен орнында мұнай өндірудің қысқаруына байланысты», — деді спикер.

Сондай-ақ, өңдеу өнеркәсібінде өсу үрдісі сақталғаны белгілі болды. 4 айда шығарылым 3,5%-ға дейін өсті. Бірінші тоқсанда өсім 1,6% құрады. Өңдеу қарқынының жоғарылауына мұнай өңдеу, машина жасау, сусындар өндіру әсер етті.