Бүгін «Банк ЦентрКредит» АҚ «Ақбұлақ» ықшамауданында орын алған қайғылы оқиғаға байланысты мәлімдеме жасап, қаза тапқандардың отбасыларына көңіл айтты, деп хабарлайды 7kun.kz іскер жаңалықтар агенттігі.

«Біз Сіздермен бірге орны толмас ауыр қайғыға ортақтасамыз. Орын алған қайғылы оқиға бізді қатты күйзелтті, барлық даулы жағдайлардың шешімі тек құқықтық желі аясында табылуы тиіс екендігіне сенімдіміз», делінген баспасөз мәлімдемесінде банк аталған істің мән-жайын түсіндіре кетуді жөн санаған.

7kun.kz іскер жаңалықтар агенттігі мәтіннің толық нұсқасын ұсынады.

2011 жылғы шілдеде қарыз алушы «Нано Плюс» ЖШС-ға негізгі борыш пен пайыздар бойынша төлем мерзімін 6 айға кейінге жылжыту арқылы жалпы сомасы 102 000 000 теңгені құрайтын екі қарыз берілді.

Шарттар бойынша міндеттемелердің орындалуын қамсыздандыру ретінде кепіл шарттары жасалды, мұнда кепілді қамсыздандыру ретінде тұрғын емес жай, жер телімі, сонымен қатар Алматы қ., Алатау ауд., «Ақбұлақ» ықш., Сыздықов көш., 29-үй мекенжайы бойынша орналасқан тұрғын үй қабылданды.

07.03.2012 жылы қарыз алушыға негізгі борыш пен сыйақыны өтеу бойынша төлем мерзімін қосымша үш айға кейінге жылжыту ұсынылды. 20.08.2012 жылдан бастап қарыз алушы міндеттемелерін орындамай, төлем мерзімін өткізіп алды. Банк 11.10.2012 жылы және 17.01.2013 жылы міндеттемелердің орындалмағаны туралы хабарламаларды жөнелтті.

Қарыз алушы мен Кепілгердің Шарттар бойынша көзделген міндеттемелерді орындамауына байланысты 17.04.2013 жылы берешекті сот тәртібімен өндіріп алу туралы шешім қабылданды. Осы сәттен бастап Банк аталған қарыз бойынша пайыз есептеуді тоқтатты.

Банк Алматы қ. Алмалы ауданының №2 аудандық сотына қарыз алушы мен Кепілгерлерден берешекті өндіріп алу туралы талап арыз берді.

 «Атқарушылық іс жүргізу және сот орындаушыларының мәртебесі туралы» ҚР заңының 74-бабының 2-тармағына сәйкес: «Кепілгер кепілге қойылған мүлікті нарықтық бағамен тәуелсіз сатуға құқылы, борышкер болса сот орындаушысы мүлікке тыйым салуды қолданғаннан және бағалау жүргізгеннен кейін және мүлік алып қойылғанға немесе өткізілгенге дейін сот орындаушысының жазбаша рұқсатымен және ол белгілеген мерзімде тыйым салынған мүлікті бағалау құнынан төмен болмайтын құн бойынша өткізуге құқылы».

 Қарыз алушы да, Кепілгер де аталған құқықтарды пайдаланбады.

 «Атқарушылық іс жүргізу» ҚР заңының 80-бабының 3-тармағына сәйкес (Электрондық аукцион борышкердің мүлкін өткізуге беру туралы қаулыда көрсетілген бағалау құнынан белгіленген қадаммен мүліктің құнын көтерумен басталады.

Электрондық аукционға қатысушылардың ешбірі сауда-саттықтың алдын ала белгіленген қадамын қолдай отырып, мүліктің құнын арттырмаған жағдайда, электрондық аукцион құнды төмендетуге ауысумен жалғасатын болады.

Бұл ретте, өткізілетін мүліктің бастапқы бағасы қатысушылардың бірі жарияланған баға бойынша мүлікті сатып алуға келіскен кезге дейін белгіленген қадаммен төмендетіледі, бұл баға электрондық аукционға қойылған мүлік құнының бастапқы бағасының елу пайызынан төмен болмауға тиіс».

 22.01.2018 жылы Алматы қ. Алатау аудандық сотының сырттан шығарылған шешімі бойынша Кепілгерге тиесілі тұрғын үй түріндегі кепіл мүлкіне өндіріп алу қолданылды.

16.08.2018 ж. тұрғын үй түріндегі кепілге берілген мүлік бойынша электрондық соттық сауда өткізілді. Электронды аукционның қорытындысы туралы хаттамаға сәйкес оның жеңімпазы болып Н.С. Турганов танылды. 23.08.2018 ж. жеке сот орындаушысы мен Н.С. Тургановтың арасында сатып алу-сату шарты жасалды.

26.12.2018 ж. Алматы қаласының Алатау аудандық сотының ұйғарымымен Алматы қаласының Алатау аудандық сотының тұрғын үй түріндегі кепілге берлген мүлікті өндіріп алу туралы 22.01.2018 жылғы сырттай шығарылған шешімінің күші жойылды.

Алматы қалалық сотының апелляциялық сот алқасының 27.11.2019 жылғы қаулысымен Банктің 29 417 000 теңге мөлшерінде іске асырған кезде бастапқы сатылым құнымен тұрғын үй түріндегі кепілге берілген мүлікті өндіріп алу туралы талап арызын қанағаттандыру туралы шешім шығарылды.

ҚР Жоғарғы сотының азаматтық істер жөніндегі сот алқасының 27.07.2020 жылғы қаулысымен А.П. Демирчяннің, И.И. Дужновтың ҚР ЖС азаматтық істер жөніндегі сот алқасының сот отырысында қарастыру үшін Алматы қалалық сотының азаматтық істер жөніндегі сот алқасының 27.11.2019 жылғы қаулысын қайта қарастыру туралы өтінішін қанағаттандырудан бас тартылды. Осылайша тұрғын үй (алғаш рет өткізілген сот саудасынан сатып алынған) Н.С. Тургановтың меншігінде қалды.

 Кейін тұрғын үйден шығару жеке тұлғаның (сатып алушы) пайдасына шығарылған сот актісінің негізінде жүзеге асырылды, осылайша тұрғын үйден шығару туралы іс азаматтар арасында құқықтық қатынастарға өтті, бұл трагедияға әкеп соқты. Банк тұрғын үйді іске асыру, кейін тұрғын үйден шығару ісін жүргізген жоқ.

Банкке кепілге берілген тұрғын емес жайға қатысты, 07.03.2017 жылы ықтимал сатып алушылардың болмауына байланысты ол бойынша бірінші электрондық соттық сауда-саттық өткізілген жоқ. 18.04.2017 ж. соттық сауда-саттық қайтадан өткізілді. Сатып алушылардың болмауына байланысты және өткізілген соттық сауда-саттықтың нәтижелері бойынша жоғарыда аталған мүлік 96 008 120 теңге сомасында аукцион аясында төмендету әдісімен өткізілген сауда-саттықтан кейін Банктің меншігіне өтті. 24.04.2017 жылы Банк пен ЖСО арасында Тұрғын емес жайда сатып алу-сату шарты жасалды.

Ұзақ уақыт бойы Банк тұрғын үйге меншік құқығын тіркей алмады, өйткені бұрынғы меншік иесі Жер қатынастары комитетінің және Банктің жұмыскерлеріне жерге орналастыру жобасы бойынша және техникалық төлқұжатты әзірлеу бойынша жұмыстарды жүргізуге мүмкіндік берген жоқ.

 Банк меншік құқығын нақты 2021 жылғы мамырда тіркеді. Сәйкесінше 2017 ж. бастап осы уақытқа дейін Банк тұрғын үйге билік еткен жоқ, сонымен қатар 2021 жылғы шілдеде жер телімімен тұрғын емес жайды пайдалануға кедергі келтіруді жоюға мәжбүрлеу жөнінде Алматы қ. Бостандық аудандық сотына талап-арыз берді.

 Банк бұл қасіретте қаза болған тұлғалардың туыстары мен жақындарының қайғысына ортақтастығын білдіреді. Біз аталған оқиғаны тергеуге белсенді қатысып, іс бойынша қажетті барлық құжаттарды ұсынамыз, сонымен қатар зардап шеккендердің туыстарына жан-жақты көмек көрсетеміз.