Алматы. 26 шілде. 7kun.kz – Бірыңғай жинақтаушы зейнетақы қоры мемлекеттік бағалы қағаздарға (МБҚ) және облигацияларға 523,7 млрд теңгеден астам қаржы салды.

БЖЗҚ 2019 жылғы маусымда Ұлттық банктің 148,7 млрд теңгеге, үкіметтің 140 млрд теңгеге бағалы қағаздарын, сондай-ақ 135,6 млрд теңгеге АҚШ үкіметінің бағалы қағаздарын сатып алды.

Бұдан басқа, қор «Қазақтелеком» АҚ-ға 38,2 млрд теңге, Еуропалық қайта құру және даму банкіне – 30 млрд теңге, «Бәйтерек» холдингіне – 20 млрд теңге және Қазақстанның даму банкіне – 11,2 млрд теңге салды.

«БЖЗҚ портфеліндегі негізгі үлесті Қазақстанның мемлекеттік бағалы қағаздары алады, олардың ағымдағы құны есепті айда 3,23 млрд теңгеге төмендеп, 4 трлн теңгеден асты. Олардың портфельдегі үлесі 40,31%-ды құрады», - деп хабарлады қорда.

Сонымен қатар, қорда шетелдік мемлекеттердің мемлекеттік бағалы қағаздарының ағымдағы құны есепті айда 85,19 млрд теңгеге төмендеп, 1,4 трлн теңгеден асты. Олардың портфельдегі үлесі 14,47%-ды құрады, деп атап өтті БЖЗҚ-да.

«2019 жылдың маусымында шетел валютасында номинацияланған зейнетақы активтерін инвестициялау көлемі 135,6 млрд теңгені құрады. Осы көлем үшін АҚШ-тың мемлекеттік бағалы қағаздары орташа алынған кірістілігі жылына 2,2% сатып алынды», - деп толықтырды қорда.

Сонымен бірге, БЖЗҚ-да 2019 жылдың басынан бастап есептелген инвестициялық табыс мөлшері 285,2 млрд теңгені құрағанын хабарлады. 2019 жылдың басынан бастап салымшылардың шоттарына бөлінген зейнетақы активтерінің кірістілігі 2,69% - ды құрады.

Бұл ретте, 2019 жылғы 1 шілдедегі жағдай бойынша зейнетақы активтерінің соңғы 12 ай ішінде (2018 жылдың шілдесінен 2019 жылдың маусымына дейін) БЖЗҚ салымшыларына арналған кірістілігі 9,36%-ды құрады, инфляция 5,4%. Сондай-ақ, соңғы 12 айда БЖЗҚ зейнетақы активтерінің нақты кірістілігі 3,96%-ды құрады.