Еуроодақ елдері Украинаға 90 миллиард еуро көлемінде несие беруге келісті.

Қаражат 2026-2027 жылдардағы бюджеттік және әскери қажеттіліктерді өтеуге бағытталады, деп хабарлайды AZERTADЖ. Алғашқы төлем сәуір айының басында жүзеге асуы мүмкін. Кипр ұсынған құқықтық мәтіндер бойынша елшілер келісімге келгеннен кейін шешім ресми бекітілді.

Кипрдің қаржы министрі Макис Керавностың айтуынша, бұл қадам ЕО-ның Украинаға қолдау көрсету ниетін айқын көрсетеді әрі елдің Ресей агрессиясына қарсы тұрақтылығын арттыруға бағытталған.

90 млрд еуро жалпы қарыз міндеттемелерін шығару арқылы қаржыландырылады, ал ЕО бюджеті инвесторларға кепіл болмақ. Қаражаттың 30 млрд еуросы бюджеттік қолдауға, 60 млрд еуросы әскери көмекке бөлінеді.

Мәміле шарттарына сәйкес Венгрия, Словакия және Чехия барлық қаржылық міндеттемелерден босатылады. Қалған 24 мемлекет жыл сайын 2–3 млрд еуро көлемінде шығынды өтеп отырады.

Несие кезең-кезеңімен және қатаң талаптар сақталған жағдайда ғана бөлінеді. Украинадағы сыбайлас жемқорлыққа қарсы саясат әлсіресе, қаржыландыру тоқтатылуы мүмкін.

ЕО бұл қарыз Ресей өтемақы төлеген жағдайда ғана қайтарылады деп есептейді. Алайда Мәскеу мұндай міндеттемеден бас тартқандықтан, Брюссель несиені өз есебінен өтеуге дайындалып отыр.

Құжаттар енді Еуропарламенттің мақұлдауын күтуде.