Алматы. 10 шілде. 7kun.kz — Қазақстанда тұрғын үй бағасы өсті. Бұл туралы ҚР Ұлттық экономика министрлігінің Статистика комитеті хабарлайды.

"2019 жылғы маусымда өткен аймен салыстырғанда абаттандырылмаған тұрғын үйлерді сату бағасы 0,6%-ға, абаттандырылған тұрғын үйлерді сату – 0,5%-ға, жаңаларын сату - 0,1%-ға өсті. Абаттандырылған тұрғын үй үшін жалдау ақысы 0,3%-ға жоғары болды", - делінген хабарламада.

Статистика комитетінің мәліметінше, жаңа тұрғын үй сату бағасы 2018 жылдың желтоқсанымен салыстырғанда 2019 жылдың маусымында 2,4%-ға артты.

Жаңа тұрғын үйдің бір шаршы метрінің бағасы да бір айда 0,1%-ға артып, 282,5 мың теңге болды. Абаттандырылған тұрғын үйдің бір шаршы метрінің бағасы 193 мың теңгені, ал абаттандырылмаған тұрғын үйдің бағасы 120 мың теңгені құрады.

Сондай-ақ, Статистика комитетінде тұрғын үй нарығындағы бағаларды бақылау Нұр-Сұлтанда, Алматы, Шымкент, Семей қалаларында және құрылыс компанияларын қоса алғанда, қалалық қор бойынша жылжымайтын мүлікпен операциялар жасайтын ұйымдардың іріктелген тобы бойынша облыс орталықтарында жүзеге асырылатынын айтты.