Астана. 22 қыркүйек. 7kun.kz –  Қайрат Сатыбалдыұлы сотта кінәсін мойындап, өкінетінін айтты, деп хабарлайды 7kun.kz.

Судья Қайрат Сатыбалдыдан сот төрелігімен келісім жасасуға дайынсыз ба деп сұрады.

«Мен өз кінәмді мойындаймын, өкінемін және процессуалдық келісіммен келісемін», – деді Қайрат Сатыбалды.

Сотта прокурор Жанкелді Есебаев Қайрат Сатыбалдыны 6 жылға бостандығынан айырып, мүлкін тәркілеуді сұрады. Сондай-ақ мүлкін тәркілеп, мемлекеттік наградаларын қайтару керектігін атап өтті. Қайрат Сатыбалды бұрын Ұлттық қауіпсіздік комитетінде қызмет етіп, генерал-лейтанат шенін алған.

Судья бірнеше рет сотталушылардан сот төрелігімен мәміле жасау кезінде қандай да бір бұзушылықтар бар ма және олардың қосатын нәрселері бар ма деп сұрады. Айыпталушылар жоқ деп жауап берді.

Судья кеңесу бөлмесіне кетті. Үкім ертең шығады деп күтілуде.

Еске салайық, Назарбаевтың жиенінің ұсталғаны туралы 18 наурызда хабарланған болатын. Бұған дейін Сыбайлас жемқорлыққа қарсы қызмет Қайрат Сатыбалдыұлына және басқа да тұлғаларға қатысты «Қазақтелеком» АҚ мен «Көліктік сервис орталығы» АҚ қаражатын аса ірі көлемде ұрлау фактілері бойынша сотқа дейінгі тергеуді аяқтағанын хабарлаған болатын.

Астана қаласында өтіп жатқан сот процесінде 5 адамның ісі қаралуда. Олардың ішінде «Қазақтелекомның» экс-мажоритарлық акционері Қайрат Сатыбалды, жекешелендіру аясында «Көлік сервисі орталығын» сатып алған «Темір Триумф» компаниясының иесі Марат Мұхамбеджанұлы, Шыңғыс Қоңырбаев, «Қазақтелеком» бөлімшесінің басшысы Леонид Муравьев және «Көлік сервисі орталығын» компаниясының басшысы Ғайни Бекетов.