Алматы. 7 маусым. 7kun.kz - «Астана» халықаралық қаржы орталығының FinTech бөлімінің директоры Асылбек Дәулетов Қазақстанда криптовалюталарды реттеу тұжырымдамасы әзірленгенін айтты, деп хабарлады LS.

«Бүгінгі күні АХҚО-ның негізгі міндеті - Қазақстандағы fintech, электронды коммерция және инновациялық жобаларды дамыту. Концепциямыз осы тұрғыда жасалып отыр. Оның көмегімен виртуалды валюталарды арнайы платформалар арқылы сақтауды және айналымын реттейтін тұжырымдаманы әзірледік», - деді Дәулетов.

Сондай-ақ, оның айтуынша, қаржы орталығы криптовалюта нарығында жиі қолданылатын анықтамаларды, мысалы, виртуалды валюталарды, олардың жіктелуін, ақылды келісімшарттарды, цифрлық әмияндарды және т.б. қосу арқылы АХҚО пактілерінде көрсетілген түсініктемені кеңейтеді.

Сонымен бірге, орталық өкілдің хабарламасына сәйкес, биткоиндер және басқа да виртуалды валюталардың пайда болуымен, ICO деп аталатын - монеталардың бастапқы орналастырылуы пайда болды.

«Көптеген юрисдикциялар бүгінгі таңда қаражат тартудың осы түрін реттейтін тиісті түзетулерді немесе жекелеген заңдарды қабылдау мүмкіндігін қарастыруда», - деп атап өтті Дәулетов.

Оның айтуынша, АҚШ пен басқа да дамыған елдердің қолданыстағы заңдары зерттелді.

«Бүгінгі күні АҚШ-тың ең дамыған ел екендігін білесіздер. Өйткені онда стартап-компанияларды дамытуға мүмкіндік беретін силикон алқабы бар. Оларда венчурлық қорлар дамыған. Тиісінше, біз осы жолмен жүрдік және эмитенттерге өздерінің бағалы қағаздарын қаржы регуляторы арқылы тіркелместен шығару арқылы қаражат жинауға мүмкіндік беретін жеке орналастыру схемасын кеңейте алдық», - деді ол.