Алматы халықаралық әуежайының өткізу қабілетін 2050 жылға қарай жылына 55 миллион жолаушыға дейін ұлғайту жоспарланып отыр.
Бұл туралы Мемлекет басшысы Қасым-Жомарт Тоқаевпен кездескен Groupe ADP компаниясының бас директоры Филипп Паскаль мәлімдеді.
Кездесу барысында Алматы әуежайын дамытудың ұзақ мерзімді бас жоспарын іске асыру мәселелері талқыланды. Мемлекет басшысы авиациялық хабтарды дамыту Қазақстанның көлік-логистика саласындағы негізгі стратегиялық басымдықтарының бірі екенін атап өтті.
Президент әуежай инфрақұрылымын жаңғыртуға және жаңа халықаралық терминалдың құрылысына Groupe ADP компаниясының қосқан үлесін жоғары бағалады. Оның айтуынша, жүзеге асырылған жобалар жолаушыларға қызмет көрсету сапасын айтарлықтай жақсартуға мүмкіндік берген.
Қасым-Жомарт Тоқаев Groupe ADP компаниясының Алматы әуежайын басқаруға қатысуын мемлекеттік-жекеменшік әріптестіктің табысты үлгісі ретінде бағалады. Бүгінде Алматы әуежайы арқылы өтетін жолаушылар саны жылына 14 миллион адамға дейін жеткен.
Кездесу барысында Қазақстан өңірлеріндегі әуежайларды дамыту және жаңа инфрақұрылымдық жобаларды бірлесіп жүзеге асыру перспективалары да қарастырылды.
Өз кезегінде Groupe ADP бас директоры Филипп Паскаль Қазақстанда авиациялық инфрақұрылымды дамыту үшін қолайлы нормативтік-құқықтық орта қалыптасқанын атап өтті. Оның пікірінше, бұл жағдай халықаралық инвесторлардың қызығушылығын арттырып, авиация саласындағы ауқымды жобаларды жүзеге асыруға мүмкіндік береді.
Мамандардың бағалауынша, Алматы әуежайының өткізу қабілетін бірнеше есе ұлғайту Қазақстанның халықаралық көлік дәліздеріндегі рөлін күшейтіп, елдің Орталық Азиядағы ірі авиациялық хаб ретінде қалыптасуына ықпал етеді.
