«Жүйе былтыр әзірленіп, қанатқақты режимде іске қосылған болатын. Бүгінгі таңда банктер кезең-кезеңмен осы жүйеге қосылып жатыр. Ұлттық төлем корпорациясы 9 банкпен келісімшарт бекітті. Ол тоғыз банк – Халық банк, Банк Центр кредит, Freedom bank, РБК, Алтын банк, Береке банк, Forte bank, HomeCredit bank және Nurbank.

Келісімшарттың бекітілуі – осы банктер жүйеге қосылу бағытында белсенді жұмыс істеп жатыр деген сөз.

Маусым айында клиенттер алғашқы бес банктің арасында телефон нөмірі бойынша аударым жасай бастайды деп күтіп отырмыз. Тізімдегі бес банк – Халық банк, Freedom, RBK, Алтын банк және Home Credit. Кейін өзгелері де қосылады, – деді Бинұр Жаленов Ұлттық банкте өтіп жатқан баспасөз мәслихатында.

Сондай-ақ, ол банктер арасындағы QR-төлемдер құралы қолданысқа дайын екенін мәлім етті.

«Freedom bank пен RBK жұмысты аяқтады. Оның сыртында тағы 4 екінші деңгейлі банкпен белсенді жұмыс жүріп жатыр. Жыл аяғына дейін бірнеше банк осы құралды іске қосады деп күтіп отырмыз», – деді Ұлттық банк басшысының кеңесшісі.