Қазақстанда банктердің клиенттермен жұмыс тәртібі өзгереді.

Қаржы нарығын реттеу және дамыту агенттігі (ҚНРДА) жаңа талаптарды бекітті. Олар қызмет көрсетуді ашық әрі қолайлы етуді көздейді, деп хабарлайды Finratings.kz.

Енді әрбір банктің сайтында арнайы калькулятор орналастырылады. Клиент қарыз алғанда ай сайынғы төлемді, артық төленетін соманы және жалпы қарыз көлемін бірден көре алады.

Аударымдар мен төлемдерге тариф өсетін болса, банк бұл туралы клиенттерге кемінде үш ай бұрын ескертуге міндетті. Осы уақыт ішінде клиент басқа тиімді ұсынысты таңдай алады.

Банктер өтініштер мен шағымдарға 15 жұмыс күні ішінде жауап беруге тиіс. Ерекше жағдайда бұл мерзім тағы 15 күнге созылуы мүмкін, бірақ одан әрі ұзартуға рұқсат жоқ.

ҚНРДА бұл шаралар клиенттердің мүддесін қорғауға және банк қызметінің ашықтығын қамтамасыз етуге бағытталғанын атап өтті.