Алматыда бұрынғы «Алмалы» сауда орталығының базасында балаларға арналған ғылым музейі құрылады. ТМД-да мұндай музей жоқ, іске қосылса бірінші нысан болмақ. Бұл туралы 2024 жылғы 6 желтоқсанда қалалық мәслихат сессиясында Алматы әкімі Ерболат Досаев хабарлады.

Музейді Science Museum Singapore-мен бірлесіп құру жоспарланған, ал процесс 2025 жылы басталады. «Бұл мақсатқа қаланың бюджетінен 12,2 миллиард теңге бөлу көзделіп отыр», — деп хабарлады Алматы әкімдігінің баспасөз қызметі. — «Science Museum Singapore — әлемдегі шығармашылық үдерістің ғылым мен өнердегі рөлін және оның қоғам санасына ықпалын зерттеуді мақсат еткен алғашқы музей».

«Алмалы» сауда орталығы Алматыдағы Республика алаңының астында орналасқан. Ол 2012 жылы ашылған. Бастапқыда құрылыс жұмыстарын 2006 жылы Беловичтер отбасының Bazis-A корпорациясы жүргізген. Алайда, дағдарыс салдарынан жұмыстар тоқтатылып, нысан көп уақыт бойы аяқталмаған күйінде қалған.

2008 жылы қала әкімдігі құрылыс компаниясының алдына алаңды ретке келтіру немесе активтерді жобаны аяқтай алатын инвесторға беру талабын қойды. Кейін Кайрат Боранбаевқа тиесілі «Алмалы» активтерді басқару компаниясына кіретін «Алмалы Трэйд» ЖШС инвестор болып танылды. 

Алайда 2023 жылдың қазан айында сотталған Қайрат Боранбаев басқа да мүліктерінің қатарында «Алмалы» сауда орталығын мемлекет кірісіне өткізді.