Енді ауылішілік жолдарды жөндеу кезінде қымбат асфальттың орнына қиыршық тас төсеу тәжірибесі кеңінен қолданылмақ. Бұл туралы Көлік министрлігі мәлімдеді.

Ведомствоның хабарлауынша, елде автомобиль жолдарын жөндеудің жаңа тәсілі енгізіліп жатыр. Жаңа нормаларға сәйкес, көлік қозғалысы аз ауылдық елді мекендердегі жолдарды жөндеу кезінде асфальтбетон жабындарын міндетті түрде пайдалану талабы жеңілдетіледі.

Министрлік мәліметінше, көптеген ауылдарда тәулігіне орта есеппен 200-ге жуық көлік қана қатынайды. Мұндай жағдайда қымбат асфальт төсеу экономикалық тұрғыдан тиімсіз деп танылған. Сондықтан жолдардың техникалық санатын өзгертпей-ақ, қиыршық тас төсеу және топырақты арнайы технологиялар арқылы нығайту әдістерін қолдануға рұқсат беріледі.

Мамандардың айтуынша, бұл тәсіл жол жөндеу жұмыстарының құнын төмендетіп, шалғай ауылдардағы жол инфрақұрылымын жаңартуды жеделдетуге мүмкіндік береді. Сонымен қатар жергілікті маңызы бар жолдардың сапасын сақтай отырып, бюджет қаражатын тиімді пайдалануға жол ашады.

Жаңа талаптарды енгізетін бұйрық ресми жарияланған күннен бастап 10 күннен кейін күшіне енеді.

Айта кетейік, бұған дейін Көлік министрлігі республикалық маңызы бар автомобиль жолдарының бойында заманауи эко-сервис нысандарын салу жоспары бар екенін хабарлаған болатын. Бұл бастама жүргізушілер мен жолаушыларға қолайлы жағдай жасап, жол бойындағы қызмет көрсету сапасын арттыруды көздейді.