Қазақстанда еңбек шарттарын қашықтан жасау тетігі енгізілді. Цифрлық даму, инновациялар және аэроғарыш өнеркәсібі бірінші вице-министрі Қаныш Төлеушин жұмыспен қамту саласындағы цифрлық шешімдер туралы айтып берді.

Оның айтуынша, бұрын жұмысқа орналасу процесінде әңгімелесу үшін жұмыс берушіге міндетті түрде жеке бару, қағаз құжаттардың толық пакетін ұсыну және қағаз түрінде еңбек шартына қол қою талап етілетін.

– Бүгінгі таңда мемлекеттік ақпараттық жүйелермен интеграция арқылы қажетті құжаттардың 90%-дан астамы автоматты электронды түрде қалыптастырылады және тартылады. Еңбек шарты электронды цифрлық қолтаңбаны қолдану арқылы қашықтан жасалады, жеке бару қажеттілігін болдырмайды, – деп түсіндірді Қаныш Төлеушин бүгінгі Үкімет отырысында.

Бұл жаңалық 9,5 миллионнан астам еңбекке қабілетті адамды қамтиды және қызмет көрсетуге кететін уақытты 3 күннен 5 минутқа дейін қысқартты.