Еуропалық Одақ Ирандағы жаппай репрессиялар мен Тегеранның Украинадағы соғысқа қолдау көрсетуіне байланысты жаңа санкциялар енгізді.

Бұл шешім 29 қаңтарда Брюссельде өткен ЕО сыртқы істер министрлерінің отырысында қабылданды.

Санкциялар шамамен 30 жеке тұлға мен ұйымды қамтиды. Оларға активтерді бұғаттау, қаржылық қолдау көрсетуге тыйым салу және ЕО аумағына кіруге шектеу қою шаралары енгізіледі. Сондай-ақ Иранға экспортталуы тыйым салынған тауарлар тізімі кеңейтілді.

ЕО мәліметінше, санкциялардың басты себебі – Ирандағы наразылықтарды күшпен басу. Министрлер соңғы толқулар кезінде құрбандар саны 30 мыңға дейін жетуі мүмкін екенін айтты. Сонымен қатар мыңдаған адам ұсталған, ал ақпараттың таралуын шектеу үшін интернет пен байланыс жүйелері бұғатталған.

Кездесудің маңызды нәтижесі – Францияның ұстанымын өзгертуі. Бұл Еуропалық Одаққа Иранның Ислам революциясы сақшылар корпусының (КСИР) террористік ұйымдар тізіміне енгізуге мүмкіндік берді. Осылайша КСИР «Аль-Каида», ХАМАС және «Ислам мемлекеті» ұйымдарымен бір қатарға қойылды.

ЕО-ның сыртқы саясат жөніндегі жоғарғы өкілі Кая Каллас Иран билігінің әрекеттерін қатаң айыптап, репрессия жүргізген кез келген режимнің өз болашағына қауіп төндіретінін мәлімдеді.

Сарапшылардың пікірінше, бұл шешім символдық маңызға ие болғанымен, Иранға қысымды одан әрі күшейтуге бағытталған саяси сигнал саналады.