Цифрлық даму министрі Жаслан Мәдиев инвестиция тартқан және ауқымды отандық табысты стартаптардың бірнеше мысалын келтірді.

«Higgsfield – генеративті жасанды интеллект моделі. Ол мәтіндік сұраныс бойынша бейнелер жасайды. Стартап Кремний алқабының әйгілі венчурлық қорларында 16 миллион АҚШ доллары инвестиция тартты. Қазіргі уақытта ол OPEN AI және Google сияқты ірі технологиялық алпауыттардың өнімдеріне тікелей бәсекелесі. Alaqan – биометриялық төлем жүйесі. Оның 100 мың қолданушысы бар. Компания Кремний алқабында акселерациядан өтті, Қазақстанда енгізуді бастады және Оңтүстік-Шығыс Азия нарығына шығуды көздеді», – деді министр Мәжіліс отырысында.

CodiPlay – EdTech саласындағы бүкіл әлем бойынша 600 мектепті қамтыған стартап.

«100 млн долларға бағаланған стартап $9 млн инвестиция тартты, Біріккен Ұлттар Ұйымының сыйлығын алды. Citix – блокчейнмен басқарылатын смарт-тақталарды жасаушы. Компания Түркия мен Таяу Шығыс нарықтарына шықты. Ол инвестор Тим Дрейперден 1 миллион доллар инвестиция алды. Grand Mobile – 60 миллион ойыншыдан тұратын ойын студиясы. 2024 жылы оның кірісі $20 млн құрады, оның 60%-ы халықаралық нарықтарға тиесілі», – деді ол.

Оның айтуынша, бұл мысалдар Astana Hub-та тиімді IT-экожүйе құрылғанын көрсетеді.