Бұл туралы компанияның баспасөз қызметі мәлімдеді. Қызметінен кеткеннен кейін Питер Фостер компаниямен ынтымақтастығын жалғастырып, директорлар кеңесінің аға кеңесшісі лауазымында жұмыс істейді.
Директорлар кеңесі Фостердің мұрагерін де анықтады. Air Astana компаниясының жаңа бас директоры болып қазіргі уақытта қаржы жөніндегі атқарушы директор қызметін атқарып жүрген Ибрахим Жанлыел тағайындалады. Ол Air Astana тобына 2003 жылы қосылып, 2017 жылдан бері компанияның қаржылық басқаруына жауап беріп келеді.
Питер Фостер Air Astana компаниясын дербес әуе тасымалдаушы ретінде құрылған кезінен бастап шамамен 20 жыл бойы басқарды. Осы уақыт аралығында компания өңірдегі жетекші әуе компанияларының біріне айналды, FlyArystan бюджеттік бағытын іске қосты және әуе паркін 61 ұшаққа дейін ұлғайтты.
Директорлар кеңесі Фостерге «компания мен Қазақстанның азаматтық авиация саласының дамуына қосқан елеулі үлесі үшін» алғыс білдірді.
Ұқсас материалдар
