Porsche компаниясының салықтарды төлегеннен кейінгі таза пайдасы 2025 жылы 310 миллион еуроға дейін төмендеп, бір жылда 91,4%-ға азайды.

Бұл туралы БЕЛТА хабарлады. Компанияның жалпы табысы да шамамен 10%-ға қысқарып, 36,3 млрд еуроны құрады. Сарапшылар мұны Қытай нарығындағы қиындықтармен, АҚШ енгізген тарифтерге байланысты шығындардың өсуімен және іштен жанатын қозғалтқыштардың қызмет ету мерзімін ұзартуға бағытталған жаңа стратегиямен байланыстырады.

Компанияның жаңа бас директоры Майкл Лейтерс модельдік қатарды қайта құрып, үнемдеу шараларын енгізуге уәде берді. Алайда бұл өзгерістер күрделі нарықтық жағдай мен геосаяси тұрақсыздық жағдайында жүзеге асырылмақ.

Сонымен қатар Volkswagen Group концернінің де қаржылық көрсеткіштері төмендеді. Компанияның салықтан кейінгі таза пайдасы 2025 жылы 44%-ға қысқарып, 12,4 млрд еуродан 6,9 млрд еуроға дейін азайған. Ал топтың жалпы табысы шамамен 322 млрд еуро деңгейінде өзгеріссіз қалған.