Qazaq Stroy компаниясының құрылтайшысы Нұрлан Артықбаев «Ақтөбе» футбол клубының инвесторы болуға келісім берді.

Бұл туралы ақпаратты Forbes Kazakhstan тілшісіне жағдайды жақсы білетін дереккөз растады.

Оның айтуынша, тараптар алдын ала келісімге келген және клуб Артықбаевтың шефтігіне өтеді. «Ақтөбе» жанкүйерлері команда құрамының жаңаруы, ойыншыларды сатып алу немесе сату, сондай-ақ футбол интернатының салынуы мүмкін екенін қызу талқылап жатыр. Алайда бұл мәселелер бойынша нақты ақпарат әзірге жоқ. Клубты дамытуға қажетті инвестиция көлемі мен ұйымдастырушылық шешімдер 2026 жылдың қаңтарында қаралады.

2025 жылғы қараша айының басында «Ақтөбені» жекешелендіру жоспарланып жатқаны туралы хабар тараған болатын. Ақтөбе облысының әкімі Асхат Шахаров шешім жыл соңына дейін қабылданатынын айтқанымен, сол кезде инвестордың аты-жөні жария етілмеген еді.

Қазақстан футбол клубтарының жекешеленуі жалғасуда. Қазірдің өзінде үш клуб жаңа иелерін тапты:

• «Қайсар» (Қызылорда) – 2025 жылы 30 қазанда TAU Group Ltd компаниясының иесі Исламғали Қозбаевқа өтті; инвестиция көлемі – 12 млрд теңге.
• «Қызыл-Жар» (Петропавл) – инвесторы ЦАТЭК компаниясының тең иесі Сергей Кан болды; ол жыл сайын кемінде 1 млрд теңге салуға міндеттелген.
• «Жеңіс» (Астана) – бизнесмен Михаил Ломтадзеге өтті; клубқа арналған футбол академиясын салуға 16 млрд теңге бөлу жоспарланған.

Сонымен қатар, Қарағандының «Шахтер» клубы да жекешелендіру нысаны ретінде қарастырылуда. Freedom Holding Corp. негізін қалаушы Тимур Турлов клуб пен футбол академиясын дамытуға қызығушылық танытқан. Қоғамдық тыңдалымдардан кейін клуб аукционға шығарылмақ, инвестиция көлемі 18 млрд теңге деп белгіленген. «Тараз», «Елімай» және «Ертіс» клубтарына қатысты да әлеуетті инвесторлармен келіссөздер жүргізіліп жатыр.

Нұрлан Артықбаев – Алматы мен Астанада тұрғын үй кешендерін салумен айналысатын Qazaq Stroy компаниясының негізін қалаушы әрі негізгі иесі. Ол 2025 жылы алғаш рет Forbes Kazakhstan тізіміне еніп, 75 ең бай бизнесменнің ішінен 44-орынға тұрақтады. Журнал оның капиталын 228 млн доллар деп бағалады. Qazaq Stroy компаниясы да алғашқы рет ірі компаниялар рейтингінен орын алып, 313,9 млрд теңге табыс және 45,7 млрд теңге таза пайда көрсеткен.

2024 жылдың соңында Артықбаевтың Telecom Systems Ltd компаниясы Jusan Bank-тен «Қазақтелекомның» 9,19% акциясын 42,77 млрд теңгеге сатып алып, 2025 жылғы 1 қазанға дейін үлесін 9,84%-ға дейін ұлғайтқан.