Бас прокуратура хабарлауынша, Шығыс Қазақстан облысында үш инвестициялық компанияға қатысты заңсыз әкімшілік шешімдер жойылды.

Облыс прокуратурасы Инвесторлардың құқықтарын қорғау комитеті үйлестіруімен жер қойнауын пайдалану және агроөнеркәсіп салаларындағы жобаларды жүзеге асырып жатқан кәсіпорындардың құқықтарын қалпына келтірген.

Жалпы инвестиция көлемі 8,4 млрд теңгені құрайтын жобалар 117 жұмыс орнын ашуды көздейді.

Атап айтқанда, Зайсан құрылыс компаниясы есептілік талаптарын бұзғаны үшін әкімшілік жауапкершілікке тартылған болса, Ертіс және Altyn Shygys фитосанитарлық талаптарды сақтамағаны үшін айыппұл алған.

Алайда тексеріс барысында бұл істер бойынша прокурордың келісімі алынбағаны анықталып, бұл заң талабының бұзылуына әкелген.

Прокуратураның наразылығынан кейін барлық заңсыз қаулылар жойылды. Сонымен қатар үш лауазымды тұлға жалпы 648 мың теңге көлемінде айыппұл түрінде әкімшілік жауапкершілікке тартылды.

Қадағалау органы инвесторлар әкімшілік кедергілерге тап болған жағдайда арнайы байланыс арналары арқылы шағымдана алатынын еске салды.