Алматы әкімі Ерболат Досаев «Қалқаман» метро бекетінің құрылыс алаңына барды. 

Метро бекеттің құрылысы 2020 жылы басталды, бірақ Наурызбай ауданының қарқынды дамуына байланысты 2022 жылы оның трассировкасы мен орналасуы қайта қаралды. Жаңа жобада жерасты тоннельдерінің ұзындығы 1,98 шақырым болады, ал бекет Абай даңғылы бойында, Әшімов көшесінен батысқа қарай орналасады. Платформаның ұзындығы 98 метр, ал оған іргелес аумақта 380 автотұрақ орны және 28 автобус тұрақ орны қарастырылады. 

2024 жылы қаржыландырудың жеткіліксіздігіне қарамастан, қазіргі уақытта жаңа бекет үшін қазылған шұңқырды әзірлеу жұмыстары қарқынды жүргізілуде. Сол жақ тоннельді қазу жұмыстары 100% аяқталды. Бастапқыда екі тоннельде бірден екі қазу кешенімен қазу жұмыстары тәулігіне орташа 3 метр жылдамдықпен жүрді. Алайда, құрылғылардың бірінің істен шығуына байланысты оң жақ тоннель бойынша тек 559 метр қазылды, ал жоспар бойынша 1587 метр болуы керек еді.

«2024 жылы жобаны жалғастыру үшін 28 млрд теңге бөлінеді. Бұл қаражатқа екінші тоннельді қазу, жер қазу және бетондау жұмыстары, сондай-ақ қажетті жабдықтарды сатып алу жоспарланған», – деді Алматы қаласы әкімінің баспасөз қызметі.

Сапар барысында Ерболат Досаев мердігерге бөлінген қаражатты толық игеруді тапсырды. Қала басшысы құрылыс қарқынын жеделдету үшін жұмыс ұйымдастыру тәсілдерін қайта қарау қажеттігін атап өтіп, нысанды 2026 жылдың қаңтарына дейін аяқтауды міндеттеді.

Әкім мердігерге қосымша қазу кешенін іздеп, оң жақ тоннельді екі жақтан бір уақытта қазуды жалғастыруды ұсынды. Сонымен қатар, қосымша ресурстарды жұмылдыруды ескере отырып, жаңартылған жұмыс кестесін тез арада ұсыну тапсырылды.

Бұл метро бекетінің ашылуы қаладағы көлік қозғалысын жақсартып, метро пайдаланушыларының санын тәулігіне 30 мың адамға арттырады. Мысалы, «Сарыарқа» және «Бауыржан Момышұлы» бекеттері іске қосылғаннан кейін метро жолаушыларының саны 50 мыңнан 110 мың адамға дейін көбейді.

BCN group директорлар кеңесінің төрағасы Александр Белович аумақта 150 маман 50 ден астам арнайы техника үш ауысыммен істеп жатыр деп сендірді. Нысан 2026 жылдың қаңтарында, жоспарланған мерзімде аяқталатынын мәлім етті.

Айта кетейік, метро құрылысы 3 жылға жетпей аяқталуы керек еді. Бірақ жобаға қажетті қаражат дұрыс бөлінбеген.

■ 2020 жылы республикалық бюджеттен 190,2 млн теңге бөлінген
■ 2021 жылы – 600 млн теңге
■ 2022 жылы – 0 теңге
■ 2023 жылы – 9,2 млрд теңге
■ 2024 жылы – 2,67 млрд теңге
■ 2025 жылы – 28 млрд теңге.

Бекет құрылысына жауапты «Базис-А» компаниясы осыған дейін қаржы республикалық бюджеттен қаржыландыруылуы керек деп мәлімдеген болатын. Алайда бөліну керек ақша кешігіп жатқанын хабарлады.