Оның мәліметінше, Жұмасұлтанов жауап алуға шақырылып, кейін күдікті ретінде танылып, ұсталған. 9 қыркүйекте Алматы қаласының тергеу соты оны екі айға қамауға алуға санкция берген. Қылмыстық істің тағы бір фигуранты үйқамаққа алынған.
Нұрлан Жұмасұлтановқа Қазақстан Қылмыстық кодексінің 188-бабы 4-бөлігі бойынша, яғни аса ірі мөлшердегі ұрлық жасады деген күдік келтіріліп отыр. Бұл бапта мүлкі тәркіленіп, бес жылдан он жылға дейін бас бостандығынан айыру жазасы қарастырылған.
Журналистің жазуынша, тергеу Алматы әуежайының аумағында сақталған Fokker 100 ұшақтарының қозғалтқыштарының жоғалуына байланысты жүргізіліп жатыр. Болжамды ұрлықты көрген куәгерлер де, оқиғаның бейнежазбасы да болмаған. Алайда 2019 жылғы желтоқсанда Bek Air ұшағы апатқа ұшырағаннан кейін маңызды айғақ табылған.
Козачковтың мәліметінше, апатқа ұшыраған ұшақтан бұрын жоғалған қозғалтқыштардың бірі анықталған. Агрегаттың сәйкестігі оның сериялық нөмірі арқылы расталған. Тергеу қозғалтқыштың пайдаланудан шығарылып, сақтауға қойылған әуе кемесінен шешіліп, кейін Bek Air пайдаланған ұшаққа орнатылған болуы мүмкін деп пайымдаған.
Қылмыстық істі бірнеше жыл бойы Көліктегі полиция департаментінің қызметкерлері тергеген. Құқық қорғау органдары шетелдерге де халықаралық тапсырмалар жолдаған. 2026 жылы Бас көлік прокуратурасы істі Ұлттық қауіпсіздік комитетінің өндірісіне берген.
Еске салайық, Bek Air әуе компаниясының Fokker 100 ұшағы 2019 жылғы 27 желтоқсанда таңертең апатқа ұшырады. Алматыдан сол кездегі Нұр-Сұлтан қаласына бағыт алған ұшақ әуеге көтерілу кезінде биіктігін жоғалтып, әуежай қоршауын бұзып өтіп, салынып жатқан үйге соғылған. Апат салдарынан 13 адам қаза тапты.
2025 жылғы қарашада Алматының Түрксіб аудандық соты әуе кемесінің командирі мен екінші ұшқышты әуе көлігінің қозғалысы мен оны пайдалану қауіпсіздігі қағидаларын бұзғаны үшін қайтыс болғаннан кейін кінәлі деп таныды. Олардың қайтыс болуына байланысты жаза тағайындалмады.
Материал жарияланған сәтте ҰҚК, прокуратура немесе сот Нұрлан Жұмасұлтановтың қамауға алынғаны туралы ресми ақпарат таратқан жоқ. Мақалада келтірілген мәліметтер Михаил Козачковтың жарияланымына негізделген. Күдіктіге қатысты соттың заңды күшіне енген үкімі шыққанға дейін ол кінәсіз деп есептеледі.
Ұқсас материалдар
