Францияның кассациялық соты 2021 жылдың наурызында коррупция және судьяны парамен сатып алуға әрекеттену айыбы бойынша экс-президент Николя Саркозиге шығарылған үкімді өзгеріссіз қалдырды.

Сот үкімімен Францияның бұрынғы президенті электронды білезік тағып, бір жыл үйқамақта отыруы тиіс. Бұл туралы ВВС жазды.

Бастапқыда ол үш жыл түрме жазасына кесілген болатын, бірақ оның екі жылы шартты жазаға ауыстырылды.

Саркози үкімді Париж апелляциялық сотында қайта қарауды сұраған, бірақ 2023 жылдың мамырында жеңіліс тапты. Үкім өзгеріссіз қалды, сот экс-президентке нақты бір жылдық мерзімді үйде өткізуге мүмкіндік беріп, электронды білезік тағуға келіссе, оның қозғалысы бақылауда болатынын айтты.

Сәрсенбіде Францияның жоғарғы сотында жеңілген Николя Саркози барлық құқықтық мүмкіндіктерін тауысты, енді үкім күшіне енуі керек.

Енді ол бір жыл бойы электронды білезік тағып жүруге міндетті. Саркози Францияның түрмеге қамалған алғашқы экс-президенті болды.

Экс-президенттің адвокаты Патрис Спинози өз клиентінің сот шешіміне бағынатынын, дегенмен Еуропа адам құқықтары сотына шағымданатынын мәлімдеді.

Саркозидің айтуынша, ол «әділетсіздіктің құрбаны» болды. Іс Еуропа адам құқықтары сотына бірнеше апта ішінде өтеді деп күтілуде, бірақ Николя Саркози Страсбургтен жауап келгенше үкімді орындауы тиіс.

2021 жылдың 1 наурызында Николя Саркози 2014 жылғы тыңдаулар ісі бойынша үш жыл түрме жазасына кесілді. Ол және оның адвокаты Тьерри Эрзог прокурор Жильбер Азиберден 2007 жылғы президенттік сайлау қаржыландыруының заңсыздығын тексеру бойынша тергеуге қатысты құпия ақпарат алуға тырысты деп айыпталды.

Тергеу нұсқасы бойынша, Саркози мен Эрзог Азиберге ақпарат бергені үшін Монакода лауазымды қызмет ұсынуды уәде еткен, бірақ бұл уәде орындалмағанына қарамастан, прокуратура ұсынылған келісімді коррупцияның көрінісі ретінде бағалады.

Үкімге шағымданған Саркози бостандықта қалған еді. Алайда, Францияның бұрынғы президентіне қатысты тағы бір коррупциялық іс қозғалды, онда прокуратура Ливия үкіметінің 2007 жылғы сайлау науқанына заңсыз қолдау көрсеткенін айыптады. Дегенмен, бұл іс сотқа әлі жіберілген жоқ.

Николя Саркози 2007 жылдан бастап бір мерзім бес жыл бойы президент қызметін атқарды. Ол әлемдік қаржылық дағдарыстан қатты зардап шеккен Франция экономикасын реформалауға және қатаң антииммиграциялық саясат жүргізуге тырысқанымен есте қалды.