Танымал кәсіпкер, Tesla мен SpaceX компанияларының басшысы Илон Маск жеке байлығы 500 миллиард АҚШ долларынан асқан әлемдегі алғашқы адам атанды. Бұл туралы BBC мен Forbes басылымдары хабарлады.

Сәрсенбі күнгі биржалық сауда қорытындысы бойынша, Масктың барлық активтерінің жалпы құны 500 миллиард доллардан асып, кейін 499 миллиард доллар шамасында тұрақтаған. Бұл көрсеткіш оны байлығы жағынан әлемдегі басқа миллиардерлерден айтарлықтай алға шығарды.

Жыл басында АҚШ-тағы саяси тұрақсыздық кезінде Tesla акцияларының бағасы едәуір төмендеген еді. Бірақ Илон Маск Ақ үймен байланысты міндеттерінен кеткеннен кейін, компания акциялары қайтадан қымбаттап, нарықтық құны 1,44 триллион долларға жетті.

Маск Tesla-ның шамамен 12 пайыз акциясына иелік етеді. Сонымен қатар, оның SpaceX және xAI жасанды интеллект саласындағы стартаптары да соңғы уақытта құн жағынан өсім көрсетіп отыр.

Forbes тізімінде Маск әлемдегі ең бай адам атағын қайтадан иеленді. Оған жақын тұрған жалғыз үміткер – Oracle компаниясының негізін қалаушы Ларри Эллисон. Оның байлығы қазіргі таңда шамамен 350 миллиард доллар шамасында.

Биылғы қыркүйекте Oracle акциялары 40%-ға өскен соң Эллисон қысқа уақытқа Илон Маскты басып озған болатын. Алайда қазіргі нарықтық жағдайға байланысты Маск қайта көш бастады.