2025 жылғы 16 тамыздан бастап Қазақстанның екінші деңгейлі банктері мен шетелдік банктердің филиалдарында клиенттердің құқықтарын қорғау жөніндегі арнайы бөлімшелер жұмысын бастайды.

Бұл өзгерістер Қаржы нарығын реттеу және дамыту агенттігінің тәуекелдерді басқару және ішкі бақылау жүйесін қалыптастыру қағидаларына енгізілген толықтырулар негізінде енгізілуде.

Жаңа бөлімшелер банктің басқа құрылымдық бөлімшелерінен тәуелсіз болады және олардың негізгі функциясы – қаржы өнімдерін ұсыну кезінде клиенттердің құқықтары мен мүдделерінің сақталуын қамтамасыз ету.

Бөлімшелердің міндеттеріне мыналар кіреді:

• банк қызметкерлері мен агенттерінің әрекеттеріне бақылау жүргізу;

• жеке тұлғалардың берешектерін реттеу шешімдерін келісу;

• қаржы өнімдерінің шарттары мен жарнамасын талдау;

• несиелік шарттарға өзгерістер енгізу туралы өтініштерді қарау процесін бағалау;

• клиенттік өтініштерді сандық және сапалық тұрғыдан сараптау;

• проблемалық несиелерді азайтуға бағытталған іс-шаралардың орындалуын бақылау;

• банктік омбудсмен шешімдерінің орындалуын қадағалау;

• директорлар кеңесіне есеп беру;

• уәкілетті органмен жедел өзара іс-қимылды қамтамасыз ету.

Сонымен қатар, клиенттердің құқықтарын сақтау саясаты банк қызметкерлері мен агенттердің әдеп нормаларын, қаржы өнімдерін ұсыну тәртібі мен ашық ақпарат беру талаптарын, клиенттермен жұмыс істеуге қойылатын біліктілік шарттарын және өтініштерді қарау рәсімдерін қамтиды.

Жаңа ережелер банктік қызметтің ашықтығын арттырып, қаржы ұйымдарының жауапкершілігін күшейтуді мақсат етеді.