Қазақстанда азық-түлік қауіпсіздігін бақылау жаңа деңгейге көтеріледі. Бұл туралы Сауда және интеграция министрі Арман Шаққалиев Үкімет отырысында мәлімдеді.

Министрдің айтуынша, елімізде сауда операциялары бойынша күн сайын 25 миллионнан астам фискалдық чек тіркеледі. Осы деректер негізінде электрондық шот-фактура мен кассалық чекті салыстыру арқылы сауда үстемесіне тұрақты мониторинг жүргізіліп келеді.

Бағаның өзгерісін тиімді бақылау үшін министрлік жаңа аналитикалық платформаны әзірлеп жатыр. Жүйе тауар санаты, өңір және жеткізуші бойынша сатып алу мен бөлшек бағаны салыстырып, сауда үстемесін анықтауға мүмкіндік береді.

Сондай-ақ, елде азық-түлік қауіпсіздігін қадағалайтын арнайы дашборд іске қосылмақ.

– Жаңа жүйе нарықтағы азық-түлік теңгерімін бағалап, тапшылық тәуекелін алдын ала анықтауға мүмкіндік береді, – деді Арман Шаққалиев.