Қазақстанда бизнеске көрсетілетін мемлекеттік қолдау шараларына жүргізілген аудит бірқатар жүйелі кемшіліктерді анықтады.

Бұл туралы Мәжілістің пленарлық отырысында Жоғары аудиторлық палата төрағасы Әлихан Смайылов мәлімдеді.

Аудит нәтижесіне сәйкес, кәсіпкерлерге арналған қолдау құралдары мен операторлар тым көп, ал оларды пайдалану тетіктері түсініксіз. Мемлекеттік қолдаудың барлық кезеңін қамтитын бірыңғай ақпараттық платформа әлі қалыптаспаған.

Бағалау бойынша, соңғы алты жылда кәсіпкерлерге шамамен 4,5 трлн теңге көлемінде қолдау көрсетілген. Оның 90 пайызы бес негізгі құралға тиесілі. Алайда Ұлттық экономика министрлігінің деректері нақты көлемнен кемінде екі есе төмен екені анықталған.

Қолдау шараларының тиімділігін бағалау әдістемесі де бірыңғай емес. Әртүрлі ведомство әрқалай есеп жүргізеді, ал экономикалық әсер нақты өлшенбейді. Кей жағдайларда бір кәсіпорын бірнеше көзден қатарынан 19-ға дейін қолдау алған.

Сонымен қатар цифрлық бақылау жүйесінің әлсіздігі, операторлар арасындағы үйлестірудің жоқтығы және заңда көзделмеген талаптардың қойылуы кәсіпкерлер үшін тең қолжетімділік қағидаттарын бұзып отыр.

Аудит барысында жекелеген жобалар бойынша қаржыландыру көлемі асыра көрсетілгені, қаражаттың тиімсіз жұмсалғаны және қарсы міндеттемелердің болмауы салдарынан миллиардтаған теңгенің нәтижесіз игерілгені белгілі болды.

Жалпы алғанда, 133 млрд теңге бюджет қаражаты тиімсіз жоспарланған және пайдаланылған, 13 млрд теңгеге қаржылық бұзушылықтар анықталған. Бірқатар материалдар құқық қорғау органдарына жолданды.

Жоғары аудиторлық палата мемлекеттік қолдау жүйесін қайта қарап, оның ашықтығы мен тиімділігін арттыруды ұсынды.