Алматы қаласы бойынша Мемлекеттік кірістер департаменті Қазақстан Республикасының заңнамасына енгізіліп жатқан өзгерістерге сәйкес, жеке тұлғаның активтері мен міндеттемелері туралы декларацияны (250.00 СЕН) ұсынуға келесі санаттар міндеттелетінін хабарлайды:

• шетелде мүлкі бар Қазақстан Республикасының азаматтары мен резиденттері;
• сайланбалы және мемлекеттік лауазымдарға кандидаттар;
• банктің, бағалы қағаздар нарығының немесе сақтандыру ұйымдарының ірі қатысушысы болуға ниетті тұлғалар;
• жеке практикамен айналысатын тұлғалар;
• декларацияны ерікті түрде тапсырғысы келетін азаматтар.

Шетелдегі декларациялауға жататын активтер:

• жылжымайтын мүлік, көлік құралдары;
• шетелдік компаниялардағы немесе тұрғын үй құрылысына қатысудағы үлестер;
• шетелдік банктердегі шоттардағы қаражат, егер олардың сомасы 1000 АЕК-тен асатын болса;
• бағалы қағаздар, туынды қаржы құралдары;
• брокерлік шоттардағы қаражат;
• интеллектуалдық меншік объектілері, авторлық құқықтар;
• цифрлық активтер;
• дебиторлық/кредиторлық берешектер;
• инвестициялық және бағалы металдар;
• құны 1000 АЕК-тен асатын мүлік (мысалы, антиквариат, сән-салтанат заттары).

Сонымен қатар, Қазақстан Республикасында және шетелде құны 20 000 АЕК-тен (2024 жылы бұл 73 840 000 теңге) асатын ірі сатып алулар жасаған тұлғаларға декларация тапсыру міндетін енгізу ұсынылады.

Маңызды: декларацияны ерікті түрде ұсынған кезде декларанттар 10 000 АЕК-тен аспайтын сомада қолма-қол ақшаны және басқа да активтер мен міндеттемелерді декларациялай алады, бұл кейіннен жеке тұлғаның шығындарын растауға негіз болады.

Егер азаматтардың қолма-қол ақшасы 10 000 АЕК-тен (2024 жылы бұл 36 920 000 теңге) асатын болса, бұл қаражатты 2024 жылдың 31 желтоқсанына дейін банктік шоттарға салу қажет.

Декларацияны қалай тапсыруға болады?

Декларацияны e-Salyq Azamat мобильді қосымшасы, «Электрондық үкімет» (egov.kz) порталы немесе Салық төлеушінің кабинеті (cabinet.salyk.kz) арқылы тапсыруға болады.