Алматыда Орталық қалалық клиникалық аурухана қызметінде өрескел заңбұзушылықтар анықталып, медициналық ұйым әкімшілік жауапкершілікке тартылды.

Тексерісті Техникалық реттеу және метрология комитеті департаменті жүргізген. Нәтижесінде ауруханада 106 пациент мониторингі модулі міндетті рәсімдерден өтпей пайдаланылғаны белгілі болды.

Аталған құрылғылар тиісті тіркеуден өтпеген, типі бекітілмеген және метрологиялық тексерулерден өтпегеніне қарамастан, емдеу процесінде қолданылған. Бұл жабдықтар жүрек соғу жиілігі, қан қысымы, қандағы оттегі деңгейі (SpO₂), электрокардиограмма (ЭКГ) және дене температурасы сияқты маңызды көрсеткіштерді өлшеуге арналған.

Мамандардың айтуынша, дәлдігі расталмаған құрылғыларды пайдалану дәрігерлік шешімдерге әсер етіп, пациенттердің қауіпсіздігіне қауіп төндіруі мүмкін.

Тексеру қорытындысы бойынша медициналық мекеме Қазақстанның «Өлшем бірлігін қамтамасыз ету туралы» заңының талаптарын бұзғаны анықталып, заңбұзушылықтарды жою туралы нұсқама берілді.

Сот шешімімен аурухана Қазақстан Республикасының Әкімшілік құқық бұзушылық туралы кодексі 419-бабы бойынша жауапқа тартылып, 600 айлық есептік көрсеткіш көлемінде, яғни 2 595 000 теңге айыппұл төледі.