Еуропалық қайта құру және даму банкі (ЕҚДБ) ЦентрКредит Банкіне (BCC) 60 миллион доллар көлеміндегі қаржы береді, деп хабарлады даму институтының баспасөз қызметі.

«Пакет ЕҚДБ-ның «Жасыл экономиканы қаржыландыру бағдарламасы II» аясындағы 30 миллион доллар несиеден тұрады. Қалған 30 миллион доллар жеке микро, шағын және орта бизнесті қолдауға жұмсалады. Бүкіл ел бойынша бұл несие Еуроодақтың Орталық Азияға арналған инвестициялық қорының гранттық қаражаты есебінен қамтамасыз етіледі», - делінген ақпаратта.

Даму институтының мәліметінше, бүгінге дейін ЕҚДБ Қазақстандағы 324 жобаға 10,2 млрд еуро инвестиция салған.

1991 жылы құрылған Еуропалық қайта құру және даму банкі (ЕҚДБ) нарықтық экономикаға көшуге, сондай-ақ жеке және кәсіпкерлік қызметті дамытуға ықпал ететін жобаларға инвестиция салады. ЕҚДБ акционерлеріне 72 ел, Еуропалық Одақ және Еуропалық инвестициялық банк кіреді.