Google және PayPal компаниялары жасанды интеллект негізінде цифрлық төлем шешімдерін дамыту үшін көпжылдық стратегиялық серіктестік туралы келісімге келді.

Бұл туралы PayPal-дың ресми баспасөз хабарламасында жарияланды.

Жаңа серіктестік аясында компаниялар пайдаланушылар атынан әрекет ететін жасанды интеллект агенттерін әзірлеуді жоспарлап отыр. Бұл ІІ-агенттер тауарларды іздеу, салыстыру және сатып алу секілді функцияларды атқара алады. Жаңа сауда форматтары PayPal-дың халықаралық төлем инфрақұрылымы мен Google-дың жасанды интеллект қызметтері негізінде жүзеге асады.

Сондай-ақ келісім аясында:

• Google өз өнімдеріне PayPal-дың төлем шешімдерін біріктіреді, атап айтқанда Hyperwallet және PayPal Payouts қызметтері енгізіледі;
• PayPal Enterprise Payments енді Google Cloud, Google Ads және Google Play секілді платформаларда негізгі төлем провайдерлерінің біріне айналады.

Қор нарығындағы өзгерістерге сәйкес:

• Alphabet акциялары алдын ала сауда барысында 1,3%-ға,
• PayPal акциялары 2,2%-ға өсті.