Қазақстан Үкіметі 2025-2030 жылдарға арналған өңірлік дамудың жаңа тұжырымдамасын бекітті.

Бұл туралы Премьер-министрдің орынбасары Қанат Бозымбаев өңірлік даму, су ресурстары және энергетикалық-коммуналдық секторларды жаңғырту жөніндегі баспасөз мәслихатында мәлімдеді.

Оның айтуынша, жаңа тұжырымдама ел өңірлерін теңгерімді түрде дамытуға, макроөңірлерді қалыптастыруға және өсудің жаңа бағыттарын айқындауға бағытталған. Негізгі мақсат – тұрғындардың өмір сүру сапасын арттыру және әр өңірдің экономикалық әлеуетін ашу.

Бозымбаев әлеуметтік, инженерлік және көлік инфрақұрылымына қолжетімділіктегі теңсіздікті жою маңызды екенін атап өтті. Инфрақұрылымы әлсіз аймақтар республикалық бюджеттен басым түрде қаржыландырылатын болады.

Үкімет моноқалаларды дамыту бойынша жаңа шаралар кешенін әзірлеген. Оған ірі кәсіпорындар мен жергілікті өндірушілер арасында ұзақмерзімді келісімдер жасау, индустриялық аймақтар құру, елішілік құндылық тізбегін дамыту және шағын-орта бизнесті қолдау кіреді.

Сонымен қатар, Үкімет Алатау қаласын дамыту бағытында белсенді жұмыс жүргізіп жатыр. Қала құрылысының бас жоспары бекітіліп, арнайы экономикалық аймақ пен жобалау кеңсесі құрылды. Қазір инженерлік-коммуникациялық желілердің техникалық схемалары әзірленуде.

«Ауылдық аумақтарды дамытуға арналған барлық мемлекеттік бағдарламалар, соның ішінде «Ауыл аманаты» мен «Ауыл – ел бесігі», үйлестірілген түрде іске асырылады. Бұл бағыттағы барлық жұмыстар Үкімет жанындағы Жобалау кеңсесі арқылы үйлестіріледі», – деді Қанат Бозымбаев.