Қазақстан Дүниежүзілік банктің статистикалық тиімділік көрсеткіштері (SPI) рейтингінде 217 елдің ішінде 44-орынға көтерілді.

Бұл өткен жылмен салыстырғанда бірден 21 позицияға жоғары (2023 жылы – 65-орын).

SPI рейтингі елдердің ұлттық статистика жүйесінің сапасын бағалайды. Бағалау деректерді пайдалану, қызметтер, статистикалық өнімдер, дерек көздері және деректер инфрақұрылымы сияқты критерийлер бойынша жүргізіледі.

2023 жылғы көрсеткіш бойынша Қазақстан 100 балдың 79,8-ін жинаған. Нәтиженің жақсаруы негізінен «Деректерді пайдалану», «Дерек көздері», «Деректер инфрақұрылымы» және «Деректерді ұсыну қызметтері» компоненттерінің айтарлықтай өсуімен байланысты.

SPI-2024 рейтингінде алғашқы үштікке Норвегия, Швеция және Канада кірді.