2026 жылдан бастап Қазақстанда банкоматтардағы бейнежазбалар алты айға дейін сақталатын болады. Бұл туралы Қаржылық мониторинг агенттігі хабарлады.

Агенттік төрағасының орынбасары Қайрат Бижановтың мәліметінше, 2025 жылдың басынан бері банкоматтар арқылы 24,2 миллиард АҚШ доллары шешілген, бұл 2024 жылдың толық көрсеткішінен 2 миллиардқа артық. Оның айтуынша, бұл қаражаттың бір бөлігі жиі «дроптар», яғни бөгде тұлғалардың карталары арқылы шешіледі.

Жаңа шектеулер мен талаптар

🔹 2026 жылдан бастап банкоматтардағы бейнежазбалар кемінде 6 ай сақталады.
🔹 500 мың теңгеден астам сомаға банк картасын толықтыру кезінде жөнелтушінің ЖСН-ін көрсету міндетті болады.
🔹 Мұндай операциялар SMS-хабарлама немесе мобильді қосымша арқылы растауды қажет етеді.

Биометрия енгізілуі мүмкін

Қазір бет-жүзді тану немесе саусақ ізі арқылы биометриялық сәйкестендіру жүйесін енгізу мәселесі қарастырылуда. Бұл тәсілдер күмәнді операциялар кезінде қолданылуы мүмкін.

Мақсат – ақшаны заңсыз шешуге тосқауыл қойып, қаржылық қауіпсіздікті күшейту.