Қазақстан ауыл шаруашылығы тауарларын жеткізетін мемлекеттер қатарын кеңейтті.

Ауыл шаруашылығы министрлігінің мәліметінше, бүгінде қазақстандық өнім ЕАЭО, Еуропалық одақ, Қытай, Жапония, Оңтүстік Корея, Моңғолия, Сауд Арабиясы, БАӘ, Иран, Әзербайжан және Өзбекстанды қоса алғанда 15-тен астам елге экспортталады.

Қытаймен құс еті мен ірі қара мал терілерін жеткізу туралы жаңа хаттамаларға қол қойылды. Сонымен бірге жылқы еті, бие сүті ұнтағы, салқындатылған сиыр және қой еті, шошқа еті мен термиялық өңделген өнімдерге қатысты келіссөздер жүріп жатыр.

Қазақстан алғаш рет Еуропалық одаққа бал экспорттайтын елдер тізіміне енді. Жапониямен тірі жылқы мен сүт өнімдері, ал Оңтүстік Кореямен балмұздақ жеткізу мәселесі қарастырылуда. Бұған қоса, Малайзия, Вьетнам, Сингапур және Катармен келіссөздер жалғасуда.

Маусым айында тоғыз жаңа кәсіпорын экспорттаушылар тізіміне қосылып, жалпы саны 3652-ге жетті. Бірқатар елдер санитариялық шектеулерді алып тастады: Түркия, Беларусь, Ресей, Қытай және Армения қазақстандық өнімге қойылған тыйымдарды жеңілдетті.

Шығыс Қазақстанда Қазақстан-Қытай бірыңғай агролабораториясы ашылмақ. Ол қазақстандық өнімді қытай стандарттарына сәйкес сертификаттауға мүмкіндік беріп, экспорт көлемін арттыруға жол ашады.