Ұлттық статистика бюросы жүргізген сауалнамаға сәйкес, былтыр Қазақстан халқының 10,8%-ы медициналық қызметтерді пайдалану кезінде қиындыққа тап болған.    

15,6%-ы ешқандай проблема көрмесе, 73,6%-ы дәрігерге жүгіну қажеттілігі болмағанын айтқан, деп жазады finprom.

Сауалнама барысында медициналық қызмет ала алмағандардың 48,6%-ы өзін-өзі емдеген. 24,1%-ы қажетті мамандардың жоқтығын, 23,5%-ы кезектердің ұзақтығын, 20,5%-ы дәрігердің көмегінсіз-ақ емделуге болатынын, 20,2%-ы дәрі-дәрмектің қымбаттығын, 18,9%-ы медициналық қызметтердің құны жоғары екенін себеп ретінде көрсеткен.

Сонымен қатар, 7,8%-ы мамандарға сенімсіздік білдірген немесе қызмет көрсету сапасының төмендігін атап өткен, 4,3%-ы медициналық мекемелердің ұзақтығын көрсеткен, ал 3,5%-ы қажетті дәрі-дәрмектердің жоқтығына шағымданған.

Ал денсаулық сақтау саласындағы қызметтердің бағасы жылдан жылға өсіп жатыр.

Соңғы мәліметтерге сәйкес, биыл сәуір айында медициналық қызметтердің бағасы жылдық есепте 14,8%-ға қымбаттаған. Ауруханалардағы қызметтер 20,7%-ға, амбулаториялық қызметтер 14,3%-ға, парамедициналық қызметтер 17,6%-ға, стоматологиялық қызметтер 14%-ға, жалпы медициналық қызметтер 12,7%-ға өскен.

Дәрі-дәрмектер, медициналық жабдықтар мен аппараттардың бағасы жалпы 12,1%-ға өсті. Медициналық жабдықтардың өзі 34,1%-ға қымбаттады, фармацевтикалық препараттар 7,5%-ға өсті, басқа медициналық өнімдер 2,7%-ға қымбаттады.

Өңірлер арасында Атырау облысы медициналық қызметтердің қымбаттауы бойынша көш бастап тұр. Бағаның ең көп өсуі Атырау облысында тіркелді – 20,6%. Одан кейін Алматы (18,7%), Батыс Қазақстан және Қарағанды облыстары (әрқайсысы 18%) тұр. Сәл қымбаттау Маңғыстау облысында байқалды – 3,9%.

Денсаулық сақтау жүйесі ең дамыған елдер рейтингі бойынша Қазақстан 89 елдің ішінде 54-орынға ие болды. Бұл көрсеткіш халық арасында жүргізілген сауалнама нәтижелеріне негізделген. Ең үздік денсаулық сақтау жүйелері Швеция, Дания, Германия, Финляндия және Швейцарияда деп танылды. Ал ең тиімсіз жүйелер Панама, Зимбабве және Чилиде тіркелген.

ТМД елдері арасында:

• Ресей – 29-орын;
• Әзербайжан – 50-орын;
• Украина – 51-орын;
• Беларусь – 56-орын;
• Өзбекстан – 67-орын.

2025 жылдың қаңтар–наурыз айларының қорытындысы бойынша, Қазақстанда денсаулық сақтау және әлеуметтік қызмет көрсету саласына негізгі капиталға салынған инвестициялар 63,3 млрд теңгеге жетті. Бұл өткен жылдың сәйкес кезеңімен салыстырғанда 23,6%-ға көп. Нақты инвестиция өсімі – 21,3%.

Денсаулық сақтау саласына ең көп инвестиция Шығыс Қазақстан облысында – 25,5 млрд теңге, Алматыда – 15,9 млрд теңге және Шымкентте – 3,3 млрд теңге тартылды. Бұл үш өңірге саланың жалпы инвестициясының 70,5%-ы тиесілі. Ең аз инвестиция Ұлытау облысында тіркелді – барлығы 36,6 млн теңге.