Қаржылық мониторинг агенттігі «Qarmet» акционерлік қоғамының (бұрынғы «АрселорМиттал Теміртау») мүлкін жымқыру фактісі бойынша «АлбаСтройДор» ЖШС директоры С.Г. Кимге қатысты тергеу жүргізіп жатыр.

Бұл туралы агенттік БАҚ-тан келіп түскен сұрауға берген жауабында хабарлады.

Ресми мәліметке сәйкес, 2015 жылы «АрселорМиттал Теміртау» АҚ мен «АлбаСтройДор» ЖШС арасында домна шлагын қайта өңдеу туралы шарт жасалған. Алайда келісімде қалдықтарға билік ету құқығы берілмеген.

Тергеу деректері бойынша, компания басшысы кәсіпорын аумағына еркін кіре алу мүмкіндігін пайдаланып, домна қоспасы мен кесек шойынды жасырын шығару схемасын ұйымдастырған. Ұрланған өнімді кедергісіз алып шығу үшін ресми түрде күзет қызметін атқарған «Күзет» ЖШС тартылған. Оның қызметкерлері автокөліктердің бақылаусыз шығуына жағдай жасағаны анықталды.

Айып тағу нұсқасына сай, ұрланған өнім кейін «ГлобалСпецТорг» және «ЦентрОптСнаб» ЖШС арқылы заңдастырылған.
Зиян көлемі 1,8 млрд теңгеден асады, жалпы ұрланған өнім мөлшері 31 мың тоннадан көп деп бағалануда.

Күдікті С.Г. Ким екі айға қамауға алынды. Қазір сотқа дейінгі тергеу жалғасып жатыр.