Өтемақы мөлшері 40%-ға дейін, кейбір жағдайларда 50%-ға дейін жетеді, деп хабарлайды ҚР Өнеркәсіп және құрылыс министрлігі.
«QazIndustry» АҚ Бизнесті ынталандыру дирекциясының мәліметінше, биылғы жылдың бірінші тоқсанында орталық кәсіпорындар шығындарының бір бөлігін өтеуге 128,2 млн теңге көлеміндегі өтінімдерді мақұлдады. Бұл – отандық кәсіпорындарды қолдауға бағытталған мемлекеттік ынталандыру шаралары.
«Өнеркәсіптік кәсіпорындар технологиялық процестерді жетілдіру, цифрлық технологияларды енгізу, жабдықтар сатып алу, шетелдік мамандарды тарту, қызметкерлердің біліктілігін арттыру және өнімді сертификаттау бойынша шығындарының 40 пайызын өтей алады», – деді дирекция басшысы Арстанбек Сағиев.
Егер кәсіпорындар қазақстандық IT-компаниялар әзірлеген цифрлық стратегияларды енгізетін болса, олардың шығындарының 50пайызын өтеуге мүмкіндіктері бар. Осылайша, мемлекет тек өндіріс орындарын ғана емес, сонымен қатар отандық IT-шешімдерді жасаушыларды да қолдайды.
Өтемақы алу бойынша ең көп өтінім машина жасау, агроөнеркәсіп, жеңіл және металлургия өнеркәсібі салаларындағы кәсіпорындардан жолданады.
QazIndustry-ге келіп түсетін өтінімдердің басым бөлігі кәсіпорындардағы еңбек өнімділігін арттыруға жұмсалған шығындарды өтеуге қатысты. Сонымен қатар, өнеркәсіптік кәсіпорындар өз тауарларын, қызметтері мен жұмыстарын ішкі нарықта ілгерілетуге жұмсалған қаражаттың бір бөлігін де қайтара алады. Мысалы, бұл өнімді сертификаттау немесе таңбалау жабдықтарын сатып алу шығындары болуы мүмкін.
Өткен жылдың мамыр айынан бастап QazIndustry кәсіпорындардың технологиялық жабдық сатып алуға жұмсаған қаражатының бір бөлігін өтей бастады. Мысалы, бұл бағыт бойынша3D-сканерлер, 3D-принтерлер және кең форматты принтерлерді сатып алу шығындарын қайтаруға болады. Бұл жаңа шара кәсіпорындарды технологиялық жабдықтарын жаңартуға ынталандырады. Сонымен қатар, ынталандыру шаралараның арқасында зауыттар мен фабрикалар өндіріс тиімділігін арттырып келеді. Мысалы, ANNC Construction компаниясының елордадағы құрылыс материалдарын өніретін зауытымемлекеттік қолдау аясында фиброцементті панельдерді бояуға арналған технологиялық желіні сатып алуға кеткен шығындарының 40 пайызынөтей алды. Қытайлық жабдықты іске қосу қосымша 25 жұмыс орнын ашуға және кәсіпорын табысын 15%-ға арттыруға мүмкіндік берді.
Дирекцияның мәліметінше, өнеркәсіпті мемлекеттік қолдау кәсіпорындарға одан әрі дамуға мүмкіндік береді. Бұл жабдықтарды жаңартуға, өнім сапасын жақсартуға және тауарлардың бәсекеге қабілеттілігін арттыруға көмектеседі.
Естеріңізге сала кетейік, 2024 жылы QazIndustry кәсіпорындардың еңбек өнімділігін арттыруға бағытталған шығындарын өтеу бойынша 1,2 млрд теңге сомасына өтінімдерді мақұлдады.
Ұқсас материалдар
