Qiwi компаниясының (атауын NanduQ деп өзгерту үстінде) америкалық депозитарлық акциялары (ADS) 6 қыркүйек, жұма күні Астана халықаралық биржасына (AIX) саудаға жіберілді, деп  хабарлады сауда алаңы. Акциялар АҚШ долларымен саудаланады.

Qiwi-дің жарғылық капиталы 10 413 522 А класты акциялардан және 52 299 453 В класты акциялардан тұрады. А класты акция 10 дауысқа ие болса, В класты акция бір дауысқа ие болады. Компанияның ADS-і тек В класты акцияларға қатысты құқықтарды куәландырады.

Қазіргі уақытта компанияның депозитарлық акциялары Nasdaq пен Мәскеу биржаларында листингтен өткен. Алайда, маусымның соңында Nasdaq Qiwi-ге листинг ережесінің 5101-бабына сілтеме жасап ADS-ін делистинг жасайтыны туралы хабарлады. 6 қыркүйек күні Nasdaq Qiwi акцияларын 16 қыркүйекте делистинг жасау туралы шешім қабылдағаны белгілі болды.